Սաուդյան Արաբիայի անվտանգության ուժերը տեղյակ են պահել Ֆրանսիայի իրենց գործընկերներին, որ եվրոպական մի շարք երկրներում, այդ թվում՝ Ֆրանսիայում, սպասվում են ահաբեկչական գործողություններ: Այս մասին հայտարարել է Ֆրանսիայի ներքին գործերի նախարար Բրիս Օրթեֆեն՝ հավելելով, որ «Ալ-Ղաիդա» խմբավորման կազմակերպելիք ահաբեկչության վերաբերյալ տեղեկությունն իրենք ստացել են մի քանի ժամ առաջ: «Վտանգը ռեալ է, եւ մենք պատրաստ ենք դրան դիմագրավելուն»,- հայտարարել է նա: Վերջին մի քանի շաբաթների ընթացքում եվրոպական մի շարք երկրներում բարձրացել է վտանգի աստիճանը: Միացյալ Նահանգներն զգուշացրել է իր քաղաքացիներին, որ եվրոպական երկրներում հնարավոր ահաբեկչական գործողությունների պատճառով ցանկալի չէ այցելել այդ երկրները:
