«Կեղծ լուրի դեմ պայքար պետք է տարվի։ Պարզ օրինակ բերեմ․ իմ դեմ երկու-երեք շաբաթ առաջ սպառնալիքների տարափ սկսվեց, ուղիղ սպառնալիքներ, լուրջ հայհոյախառը սպառնալիքներ։ Եվ ես դիմեցի ոստիկանություն, բայց պետք է լինի իրական սպառնալիք, և ֆեյք խմբերը բավականին իրազեկ են և շատ լավ գիտեն՝ ինչպես գրել, որ այդ մասով հանցակազմ չլինի և չկարողանաս պատասխանատվության ենթարկել։ Այո՛, կեղծ լուրերն ազգային անվտանգության խնդիր են։ Լուծման մեխանիզմները պետք է քննարկենք հենց ԱԺ-ում։ Սա խնդիր է և այս խնդիրը որևէ կերպ պետք է լուծում ստանա, որևէ մեկս կասկած չունի»,-«Առաջին լրատվական»-ի հետ զրույցում ասաց
«Իմ քայլը» խմբակցության պատգամավոր Գայանե Աբրահամյանը՝ անդրադառնալով նախօրեին վարչապետ Նիկոլ Փաշինյանի՝ ԱԱԾ պետի հանձնարարականին, ըստ որի՝ քայլեր ձեռնարկել սոցցանցերում և լրատվամիջոցներում ապատեղեկատվության դեմ։
Հարցին՝ արդյոք այդ կեղծ լուրերը ուղղորդվում են նախո՞րդ իշխանության կողմից, Գայանե Աբրահամյանը նշեց․«Մեծ վերլուծական միտք և հետազոտական հմտություններ առանձնապես պետք չեն՝ հասկանալու՝ ում էր պատկանում մամուլը նախկինում, և հիմա իրենք որ դաշտում են։ Եվ այսպիսի իրավիճակ, երբ բավական լուրջ մեդիառեսուրս ընդդիմության ձեռքում է, չի եղել։ 2002թվականից երբևէ ընդդիմությունը հեռուստաընկերություն չի ունեցել, հիմա հակառակ պատկերն է, կառավարող ուժը չունի մեդիառեսուրս, կա մեկ թերթ, որը նախկինում անմիջականորեն կապված է եղել վարչապետի հետ»։
Պատգամավորը նշեց, որ կարևոր է մեդիաների՝ ինքնակարգավորման մեխանիզմ ունենալը։
