«Մարդու իրավունքների և հանրային հարցերի մշտական հանձնաժողովը դառնալու է յուրաքանչյուր այն քաղաքացու հանձնաժողովը, ում իրավունքները ոտնահարվելու են: Մենք լինելու ենք բաց հարթակ՝ սուր անկյունները քննարկելու և օրենսդրական լուծումներ գտնելու համար»,- «Առաջին լրատվական»- ի հետ զրույցում այս մասին ասաց ԱԺ Մարդու իրավունքների և հանրային հարցերի մշտական հանձնաժողովի նորընտիր նախագահ Նաիրա Զոհրաբյանը:
Անդրադառնալով ցմահ դատապարտյալ Մհեր Ենոքյանի շուրջ առաջացած թնջուկին՝ կապված ներման գործընթացի հետ, Ն. Զոհրաբյանը նշեց, որ նախկինում, որպես լրագրող, մանրամասն ծանոթացել է գործին. «Բայց գաղտնիության փուլ կա, և ես չեմ ցանկանում իմ տեսակետն արտահայտել, որպեսզի այն չընկալվի որպես ճնշում Մարդու իրավունքների հանձնաժողովի նախագահի կողմից: Մեկ բան ասել եմ և հիմա կրկնում եմ իմ դիրքորոշումը. մենք քննարկելու ենք օրենսդրական նախաձեռնություն, որպեսզի ներման գործընթացի ինչ-որ փուլում հաշվի առնվի նաև զոհերի իրավահաջորդների տեսակետը: Սա կարևոր է, որպեսզի ունենանք արդար որոշում»: Ն. Զոհրաբյանն ընդգծեց, որ մեր դատաիրավական համակարգում լուրջ ռեֆորմների կարիք կա:
«Տարիներ շարունակ ես խնդրում և պահանջում էի իշխանություններից, որ ներում շնորհեն ցմահ դատապարտյալներ Արմենակ Մնջոյանին և Արսեն Արծրունուն: Եվ երբ Ա. Մնջոյանին տեղափոխեցին հիվանդանոց՝ սրտի կաթվածով, և նա մահացավ, ես գրեցի, որ որպես պատգամավոր և որպես քաղաքացի, ես ամաչում եմ, որ ժամանակին չկարողացանք կանխել այդ մեկ մահը,- նշեց ԱԺ Մարդու իրավունքների և հանրային հարցերի մշտական հանձնաժողովի նախագահը: – Հիմա հորդորում եմ նորից, ժամանակն է ներում շնորհել «Դրոյի գործով» դատապարտված Արսեն Արծրունուն: Հարգարժա՛ն վարչապետ և նախագահ, արեք այդ քայլը, որովհետև վաղը կարող է ուշ լինել, ինչպես ուշ եղավ հրաշալի մտավորական և մեծ հայրենասեր Արմենակ Մնջոյանի դեպքում»:
Մանրամասն՝ տեսանյութում:
