Դեկտեմբերի 9-ին տեղի կունենան ԱԺ արտահերթ ընտրություններ։ Կուսակցություններն արդեն հրապարակել են իրենց համամասնական ու ռեյտինգային թեկնածուների ցուցակը։ Հետաքրքրական է Հայաստանի հանրապետական կուսակցության ցուցակը, որում տեղ է գտել նաև Շիրակի մարզի Անի համայնքի ՀՀԿ տարածքային կառույցի ղեկավար, Անի համայնքի աղմկահարույց ղեկավար Արտակ Գևորգյանի վարորդ Առաքել Հայրապետյանն, ով հայտնի է Շեկո մականունով։
Առաքել Հայրապետյանը ՀՀԿ համամասնական ցուցակի 111-րդ համարն է և կուսակցության Շիրակի մարզի ռեյտինգային թեկնածուն։ Քարոզարշավը դեռ չսկսած, ՀՀԿ թեկնածուն գյուղերում նախընտրական խոստումներ է տալիս։ Մասնավորապես՝ Շիրակի մարզի Սառնաղբյուր համայնքում, որն ունի ջրի խնդիր, խոստացել են ջրով ապահովել, գյուղի փողոցներն ասֆալտապատել և այլն։
Սակայն, ինչպես խոսում են համայնքում, անգամ Արտակ Գևորգյանը չի պատրաստվում ամբողջ ուժով սատարել իր վարորդին, քանի որ ավելի ձեռնտու է սատարել ՔՊ-ական ինչ-որ թեկնածուի, քան հարազատ կուսակցության։
Մարալիկցիների խոսքով՝ Արտակ Գևորգյանը չի կողմնորոշվում՝ որ թեկնածուին սատարել, այնուամենայնիվ իր վարորդ թեկնածուի հետ գաղտնի հանդիպումներ են ունենում բնակիչների հետ, այցելում նրանց տները, խոստումներ տալիս։
