Կարծում եմ, որ կոնկրետ անձանց նկատմամբ թիրախավորված հայտարարություններ են արվում: Այս մասին «Առաջին լրատվական»-ի հետ զրույցում նշեց ՀՀԿ խմբակցության պատգամավոր Կարինե Աճեմյանը՝ անդրադառնալով Սերժ Սարգսյանի եղբոր՝ Սաշիկ Սարգսյանի վերաբերյալ Նիկոլ Փաշինյանի հայտարարություններին և նրա պատասխան հայտարարությանը:
Նրա խոսքով՝ վարչապետի կողմից նման հայտարարություններն անթույլատրելի են թե՛ ներդրումների, թե՛ բանկային գաղտնիքի հրապարակման հետ կապված. «Մենք ունենք բանկային գաղտնիքի մասին օրենք: Երկրի առաջին դեմքի մակարդակով այդպիսի հայտարարություն անելը համարում եմ անթույլատրելի: Ինքներդ էլ ծանոթացել եք, որ ներդրողները գործարարները մտահոգություն են հայտնում՝ կապված և ներդրումների ծավալի կտրուկ նվազեցման և տնտեսական իրավիճակի հետ: Որոշ գործարարներ դա համարում են կրիտիկական»,-ասաց նա:
Կարինե Աճեմյանի խոսքով՝ արդեն իսկ Ալեքսանդր Սարգսյանն իր հայտարարության մեջ նշել է, որ իր ունեցած գումարները որևէ կապ չունեն բյուջեի հետ. «Նույնիսկ եթե կապ ունենա, նույնիսկ եթե վերադարձի պայմաններ լինեն, դրանք այդ մակարդակով և այդ հարթակներում չէ, որ պետք է արվեն: Չի կարելի այնպես անել, որ ներդրումային դաշտը վտանգվի, այն էլ այն ժամանակ, երբ տնտեսությունը պետք է վերականգնենք, որ տնտեսությունը շնչի, իսկ առանց ներդրումների դա հնարավոր չի լինեի»,-հայտարարեց ՀՀԿ-ական պատգամավորը:
