Թավշյա, ոչ բռնի հեղափոխության միջոցով հաստատված իշխանության՝ 2008 թվականի մարտի 1-ի դեպքերի բացահայտմանն ուղղված քայլերը ԵՄԿ նախագահի ժամանակավոր պաշտոնակատար Արա Կետիկյանին գոհացնում է։ «Շատ ճիշտ քայլեր են կատարում։ Սա իմ անձնական կարծիքն է: Դա պետք է շարունակական լինի։ Ի վերջո, իրականությունը պետք է բացահայտվի»,- նշեց Արա Կետիկյանը։
«Առաջին լրատվական»-ի հետ զրույցում վերջինս նշեց, որ միությունում հարցի վերաբերյալ քննարկում տեղի չի ունեցել։ ԵԿՄ-ն Մարտի 1-ի բացահայտման ուղղությամբ իշխանությունների քայլերի վերաբերյալ միասնական գնահատական չունի․ «Երբ համագումար կանենք, համագումարի աշխատանքները կավարտվեն, քննարկում կանենք և պաշտոնապես կհայտնենք մեր տեսակետը»։
«Սա մեծ ողբերգություն է մեր ազգի համար, մարդիկ են զոհվել։ Իհարկե, կարելի էր անել ամեն ինչ, որպեսզի դա չլիներ։ Այդ օրվա իշխանությունների պահվածքը ադեկվատ չի եղել»,- ասաց Կետիկյանը և ավելացրեց՝ անհամբեր սպասում են, որ ի վերջո դատական մարմինները իրենց վերջնական գնահատականը տան կատարվածին՝ վճռի տեսքով։
Կետիկյանի խոսքերով՝ Մարտի 1-ի ժամանակ շատ երկրապահներ գտնվել են հենց ժողովրդի կողքին՝ որպես անհատներ, միությունը քաղաքականացված չէ, ասում է ԵԿՄ նախագահի ժամանակավոր պաշտոնակատարը։ «Մեր միությունը մարտի 1-ին կոնկրետ հրահանգ չի տվել՝ լինել ժողովրդի կողքին, թե ոչ։ Բայց շատ երկրապահներ, իմ ընկերները եղել են ժողովրդի կողքին»,- ընդգծեց ԵԿՄ-ականը։
