ԱԺ «Ծառուկյան» խմբակցության պատգամավոր Նաիրա Զոհրաբյանը կառավարությանը, վարչապետին խորհուրդ է տալիս պոպուլիզմ փնտրել ոչ թե իրենց խմբակցության նախագծերի մեջ, այլ՝ սեփական խոստումների և գործողությունների։
«Եթե խոսակցությունը տեղափոխվում է այդ դաշտ, պիտի խորհուրդ տամ՝ վստահաբար կգտնեն պոպուլիզմ 850 մլն խոստացված, բայց էդպես էլ չիրականացված ներդրումների դաշտում։ Պոպուլիզմ խորհուրդ կտամ գտնել տարբեր գմփոցների, դմփոցների, որ էդպես էլ չիրականացվեց տնտեսական գոլերի տիրույթում։ Մենք ներկայացրել ենք բավականին գրագետ և հավասարակշռված նախագիծ»։
Հիշեցնենք, որ այսօր կառավարությունը բացասական եզրակացություն էր տվել ԱԺ «Ծառուկյան» խմբակցության պատգամավորների կողմից ներկայացված 2 օրենքի նախագծի, մեկը վերաբերում էր Ընտրական օրենսգրքում փոփոխություններ կատարելուն, մյուսը՝ գյուղատնտեսությանը ուղղվող պետական աջակցության սահմանմանը։ Կառավարության անդամները՝ վարչապետի գլխավորությամբ, բավականին կոշտ արձագանքեցին՝ հատկապես ԱԺ պատգամավորներ Միքայել Մելքումյանի, Նաիրա Զոհրաբյանի ու Վարդևան Գրիգորյանի կողմից ներկայացված «Գյուղատնտեսության պետական աջակցության մասին» ՀՀ օրենքի նախագծի վերաբերյալ օրենսդրական նախաձեռնությանը:
Կարեն Կարապետյանն անգամ շեշտել էր․ «Այդպես ո՞նց կլինի, վաղը նախաձեռնելու են` եկեք բոլորին փող տանք, եկեք բոլոր հարկերն ազատենք: Եթե տակը հաշվարկ չկա, ինչպե՞ս որոշենք՝ ճիշտ է, սխալ է, գուցե այդ նախաձեռնությունների մեջ որոշակի նման հայտանիշնե՞ր ձևակերպենք»,- հայտարարել էր նա։ Կարեն Կարապետյանը նաև ընդգծել էր, որ այսպես հնարավոր է պարբերաբար պոպուլիստական առաջարկություններ ներկայացվեն կառավարությանը:
Նաիրա Զոհրաբյանը ընդգծեց, որ գյուղատնտեսության փոխնախարարը նախագիծը ներկայացնելիս, բովանդակությունը խեղաթյուրել է։
«Մենք շատ պարզ հստակ ձևակերպում ենք անում՝ ոչ թե թողնենք այս կամ այն կառավարության բարի կամքին․ երբ ուզենան սուբսիդավորեն գյուղացիական տնտեսությունները, երբ չուզենան՝ ոչ, այլ ասում ենք՝ օրենքով սահմանել գյուղատնտեսական պետական աջակցությունը։ Սսենք՝ ինչ-որ աղետ եղավ, ոչ թե ինչ-որ մեկի բարի կամքով որոշեն՝ սրան էսքան տալ, նրան էնքան, այլ սահմանել պետական աջակցություն օրենքով, և չափը սահմանվի բյուջեի աճի հետ համամասնորեն, ինչքան շատ լինի բյուջեի աճը, այնքան պետական աջակցության թիվը կաճի։ Ինձ համար անհասկանալի էր վարչապետի հարցը զեկուցողին, արդյո՞ք որևէ հաշվարկ ներկայացրել են, կրկնեմ՝ գուցե վարչապետին լավ չեն ներկայացրել նախագիծը։ Մենք չէինք կարող որևէ հաշվարկ ներկայացնել, այն պարզ պատճառով, որովհետև մենք ասում ենք՝ ինչքան աճում է բյուջեն, այնքան համամասնորեն տրվի, մենք չէինք կարող ենթադրել մյուս տարի, էն մյուս տարի աճը որքան է լինելու»,-ընդգծեց Նաիրա Զոհրաբյանը։
Մանրամասները՝ տեսանյութում։
