«Հանրապետությունում սպանությունների 17 տոկոսը կատարվում է ընտանիքում, և այս վիճակագրությունը պետք է մտահոգի ցանկացած առողջ մարդու»,- «Առաջին լրատվական»-ի հետ զրույցում ասաց իրավապաշտպան Զարուհի Հովհաննիսյանը՝ անդրադառնալով ընտանեկան բռնության կանխարգելման վերաբերյալ օրինագծին և դրա դեմ պայքարողներին։
Իրավապաշտպանի խոսքով՝ անչափահասների նկատմամբ սեռական բռնության 47 տոկոսը ևս կատարվում է ընտանիքում, որը սահմռկեցուցիչ թիվ է, և դրա դեմն առնել է պետք։ «Ո՞նց կարող է այդ թիվը մարդկանց չսթափեցնել, և նրանք դեմ արտահայտվեն բռնությունը կանխարգելող օրենքին։ 2015 թվականից 50 կին սպանվել է ընտանեկան բռնության հետևանքով։ Սա այսբերգի գագաթն է, որը տեսանելի է, բայց այնքան ընտանիքներ կան, որոնք փակ են, ու մենք չենք իմանում բռնությունների դեպքերի մասին։ Հիմա ինչպես կարելի է ասել, որ պետք չէ լծակ տալ որևէ մեկին մտնել ընտանիք կանխելու բռնությունների դեպքերը»,- նշեց Հովհաննիսյանը։
Իրավապաշտպանի խոսքով՝ այնպես չէ, որ հայ կանայք նախընտրում են ծեծվել և լռել։ Եթե օրենքը լինի, համապատասխան լծակներ լինեն, բոլորն էլ բռնության դեպքում կօգտվեն օրենքից, քանի որ մինչև հիմա չգիտեն՝ բռնության դեպքում ում դիմեն, ինչպես դիմեն։
Առավել մանրամասն՝ տեսանյութում:
