Մակեդոնիան մերժել է երկրի անվանումը փոխելու մասին առաջարկը՝ հայտնելով, որ առաջարկվող տարբերակը նույնքան օտար է , որքան «կլինգոնյան» լեզուն Star Trek ֆիլմում, հաղորդում է AFP-ն։
Աթենքը, Բրյուսելը ու ՄԱԿ-ը բալկանյան երկիրն անվանում են Նախկին Հարավսլավական Հանրապետություն Մակեդոնիա։ Հունաստանը պնդում է, որ Մակեդոնիա անվանումը պետք է օգտագործվի միայն իր հյուսիսային նահանգի համար։
«Երբ մենք ասում ենք ՆՀՀՄ, այդ անունը նույնպիսի առնչություն ունի իմ երկրին, որքան «կլինգոնյան» լեզուն Star Trek ֆիլմում»,- Բրյուսելում մամուլի ասուլիսի ժամանակ հայտնել է Մակեդոնիայի ԱԳ նախարար Նիկոլա Դիմիտրովը։ Ընդ որում նա ակնարկել է, որ Հունաստանի հետ հնարավոր է փոխզիջման մեկ այլ տարբերակ։ «Մենք պետք է գտնենք միջոց։ Կարծում եմ, դա հնարավոր է․․․ Մենք պետք է ճիշտ քայլեր անենք մտածված ու անհրաժեշտ պահին»։
Մակեդոնիայի նոր վարչապետ Զորան Զաևը անցած ամիս առաջարկել էր, որ իր երկիրը կարող է անդամակցել ՆԱՏՕ-ին ու ԵՄ-ին պայմանական անվանումով։
«Նոր կառավարության հետ, որը պատրաստ է ակտիվ մասնակցել բարեփոխումների իրականացմանը, կա իրական հնարավորություն երկիրը առաջ մղել ԵՄ-ին ինտեգրվելու ուղով»,- ասել է ԵՄ արտաքին գործերի ու անվտանգության քաղաքականության հարցերով գերագույն ներկայացուցիչ Ֆեդերիկա Մոգերինին։
