«Ծառուկյան» դաշինքի խորհրդարանական խմբակցության քարտուղար Վահե Էնֆիաջյանը «խմբագրել» է նույն դաշինքի ներկայացուցիչ, ԱԺ փոխնախագահ Միքայել Մելքումյանի՝ ավելի վաղ արած հայտարարությունը, թե խնդիր չեն տեսնում 2018 թվականին Սերժ Սարգսյանի վարչապետ լինելու հարցում: Էնֆիաջյանը հայտարարել է, որ դա ներկայումս քաղաքական օրակարգի թիվ մեկ հարցը չէ, և ամեն ինչ կլինի իր ժամանակին, երբ ժամանակը կգա, դաշինքը կհայտնի խնդրի վերաբերյալ իր դիրքորոշումը:
«Ծառուկյան» դաշինքի դիրքորոշումը, անկասկած, կախված է լինելու մի խնդրից՝ 2018 թվականի իշխանության հարցում Գագիկ Ծառուկյանի երաշխիքներից: Ըստ էության, հենց այդ երաշխիքների խնդիրն է «Ծառուկյան» դաշինքի գոյության հիմնական մոտիվներից մեկը: Ծառուկյանը 2018-ին Հայաստանի իշխանության հարցում լիովին նոր իրավիճակին ընդառաջ իր, այսպես ասած, ապահովագրական մեխանիզմն է դիտարկել դաշինքը և ներգրավել ընտրական գործընթացին՝ չունենալով որոշակիություն, թե ինչպիսին է լինելու իշխանությունը 2018-ից հետո: Ավելի շուտ՝ ով է լինելու իշխանությունը, որովհետև, մեծ հաշվով, իշխանությունը լինելու է թերևս այնպիսին, ինչպիսին այժմ է: Իսկ ահա թե ո՞ւմ գլխավորությամբ, այսինքն՝ ո՞վ է «երաշխավորելու» ներիշխանական «սահմանադրականությունը» 2018-ից հետո, Ծառուկյանի համար պարզ չէ, ինչպես որ պարզ չէ գործնականում ամբողջ դաշտի, այդ թվում՝ ՀՀԿ համար: Այդ պայմաններում առավել ևս Ծառուկյան դաշինքը չի գնա ժամանակից շուտ որևէ դիրքորոշում հայտնելու, որովհետև վրիպումը կարող է թանկ նստել: Խաղադրույք կատարել Սերժ Սարգսյանի՞, թե՞ Կարեն Կարապետյանի վրա: Միևնույն ժամանակ, խնդիրը գուցե ոչ այնքան հենց այդ դիլեման է, կամ ոչ միայն հենց այդ դիլեման, այլ նաև այն, թե ինչ հարաբերությունների համակարգ է գործելու 2018 թվականից հետո այս կամ այն դեպքում: Որովհետև, եթե անգամ մնում է Սերժ Սարգսյանը, կասկածից վեր է, որ նա վերանայելու է իշխող համակարգում առկա հարաբերությունների կարգը, քանի որ իշխանության խնդիրները այլևս փոխվում են կառավարման մոդելի հետ անխուսափելիորեն գալիք իրականությանը և խնդիրներին զուգահեռ:
Ակնհայտ է, որ ներիշխանական հարաբերությունների ներկայիս համակարգով անհնար է լուծել նոր խնդիրները: Դա նշանակում է խաղի նոր կանոններ, նոր պայմանավորվածություններ, նոր դերեր: Եվ ըստ այդմ՝ Գագիկ Ծառուկյանը խնդիր ունի հասկանալու իր նոր դերը անգամ այն դեպքում, երբ մնում է Սերժ Սարգսյանը: Ընդհանրապես, նա ունի՞ դեր, թե՞ ամեն ինչ ավարտվեց 2017-ի ապրիլի 2-ին, ու դրա վկայությունն էր նաև այն, որ մայիսին Երևանի քաղաքապետի ընտրությանը Ծառուկյանի մասնակցության անհրաժեշտություն այլևս չզգացվեց: Ծառուկյանը այդ խնդիրները ճշգրտելուց հետո միայն կհայտնի իր դիրքորոշումը 2018-ի վերաբերյալ:
Մյուս կողմից, իհարկե, առանձին քննության կարիք ունի այն, թե ընդհանրապես այդ դիրքորոշումը որքան է կարևոր կամ վճռորոշ Սերժ Սարգսյանի համար, քանի որ այդտեղ էլ ոչինչ միարժեք չէ, և Ծառուկյանը, որ ունի «ֆալստարտի» մտավախություն, կարող է պարզապես ուշանալ:
