«Հայկական ժամանակ» թերթը գրում է. «Սերժ Սարգսյանի՝ կառավարություն կատարած այցից առաջ կառավարության դիմաց նախագահականի անվտանգության աշխատակիցներն ու ոստիկանության ծառայողները ուժեղացված հսկողություն էին իրականացնում: Կառավարության բակում փորձում էինք իրավիճակը պատկերող լուսանկարներ և տեսանյութ ստանալ: Նախագահականի թիկնազորի անդամներից մեկը մոտեցավ և ասաց. «Մի՛ նկարի»: Նախ, խնդրեցինք ասել, թե ով է ինքը և ինչո՞ւ է պահանջում, որ նկարահանում չիրականացնենք: Ասաց, որ պարզապես քաղաքացի է, և շարունակեց. «Չենք խոչընդոտում, քեզ ընգերական խորհուրդ ենք տալիս, չնկարե՛ս»:
–Դուք ասում եք, որ քաղաքացի եք և եկել եք ընկերական խորհո՞ւրդ եք տալիս:
– Հա, լավ չի՞, լավ չի՞:
– Անվտանգության աշխատո՞ղ եք:
– Չէ, անվտանգության աշխատող չեմ: Քո անունն ի՞նչ ա:
– Գրած է բեյջիս վրա՝ Մուրադյան Տիրայր:
– Կարդալ էլ չգիտեմ է: Տիրա՞յր:
– Այո: Դուք նախագահականի թիկնազորից չե՞ք:
– Չէ, ապե, вулканизаторщик եմ:
Նախագահականի вулканизаторщик թիկնապահը այնուհետև պահանջեց, որ իրեն չնկարենք և փորձեց հիմնավորել, որ առանց թույլտվության ենք նկարահանում: Նրան պարզաբանվեց, որ կառավարության բակը հանրային տարածք է, և որ դրա համար թույլտվություն ստանալու կարիք չկա, որից հետո նրան մոտեցան կառավարության անվտանգության աշխատակիցները, թևանցուկ արեցին և զրուցելով մի փոքր հետ տարան:
Երբ արդեն կառավարության շենքի ներսում էինք և լրագրողներով սպասում էինք Սերժ Սարգսյանի ժամանմանը, նույն вулканизаторщик-ը մտավ կառավարության շենք, մոտեցավ լրագրողների խմբին և իր բջջային հեռախոսը պարզեց մեզ վրա: Նկարահանում անելուց հետո արագ հեռացավ և կանգնեց նախագահականի թիկնազորի անդամների կողքին:
Առավել մանրամասն՝ թերթի այսօրվա համարում:
