ՀՀ էներգետիկ ենթակառուցվածքների և բնական պաշարների նախարարությունում ակտիվ քննարկման փուլում է չգազաֆիկացված համայնքների հելիոֆիկացման՝ արևային էներգիայի արտադրություն հիմնելու ծրագիրը: Հունիսի 28-ին Գերմանա-հայկական հիմնադրամի շրջանակում իրականացվող «Վերականգնվող էներգիայի խրախուսում» վարկային ծրագրի շահառուների համար կազմակերպվող սեմինարի ժամանակ այս մասին ասաց ՀՀ էներգետիկ ենթակառուցվածքների և բնական պաշարների նախարարի տեղակալ Հայկ Հարությունյանը:
«Ներկայումս ունենք 320 չգազաֆիկացված համայնք, որտեղ ապրում են Հայաստանի բնակչության 5 տոկոսը: Այստեղ գազաֆիկացում կատարելը բավականին ծախսատար է և տնտեսապես չհիմնավորված: Լեռնամերձ գյուղի օրինակով ցույց ենք տվել, որ հնարավոր է մի քանի անգամ ավելի քիչ գումար ծախսելով արևային ջրատաքացուցիչներ տեղադրելը»,- ասաց Հարությունյան։
Նրա խոսքով` հստակ հաշվարկ է արված տվյալ համայնքներում որքան ներդրում է անհրաժեշտ, որ հնարավոր լինի յուրաքանչյուր տանիքում ջրատաքացուցիչներ տեղադրել:
«Ունենք նաև տվյալներ, թե որքան ներդրում է պահանջում հետագայում ֆոտովոլտային համակարգեր, պելետային կաթսաներ, բիոգազի սարքեր տեղադրելու համար: Այսինքն`այն գումարները, որոնք պահանջվում էին գազաֆիկացման համար, կարելի է ծախսել գյուղերում ամբողջովին վերականգնվող էներգիայի արտադրություն ներդնելով»,- եզրափակեց Հարությունյանը:
