Հայաստանում դիտարկված 452 ապրանքներից և ծառայություններից 2017թ-ի մարտին փետրվարի համեմատ 206-ի գծով արձանագրվել է գնաճ, 193-ի գծով գնանկում, իսկ 53-ի գները մնացել են անփոփոխ: Այս մասին ասել է ՀՀ ազգային վիճակագրական ծառայության նախագահի խորհրդական Գուրգեն Մարտիրոսյանը: Նրա ներկայացմամբ` որոշ ապրանքներÕ « գծով գնանկման տոկոսն ավելի բարձր է, քան գնաճինը:
«5 -10 տոկոս գնաճ ունեցել են 17 ապրանքներ և ծառայություններ, իսկ 5-10 տոկոս գնանկում ունեցել են 8-ը, սակայն եղել են նաև ապրանքներ, որոնք ունեցել են 10 տոկոսից բարձր գնանկում: Դրանք ավելի էական գնանկում են ունեցել, ընդհուպ մինչև 50 տոկոս: Այդպիսի ապրանքներից են, օրինակ` կանաչ սոխը, որի գնանկումը կազմել է 51 տոկոս, մաղադանոսը` 30 տոկոս, դդմիկը` 20 տոկոս, կիսաճտքավոր և ճտքավոր կոշիկներ` 13 տոկոս, կանանցի հագուստեղեն` 4-5 տոկոս, լոլիկ` 11 տոկոս, սմբուկ` 12.7 տոկոս, վարունգ` 11 տոկոս: Առավել բարձր գնաճ արձանագրվել է կաղամբի` 19.1 տոկոս, իշխան ձկան` 15.5 տոկոս, թառափի` 11. 6 տոկոս, սնկի` 11 տոկոս մասով և այլն: Մյուս ապրանքների և ծառայությունների գները համեմատաբար ավելի կայուն են եղել»,- ասաց Մարտիրոսյանը:
ՀՀ ազգային վիճակագրական ծառայության նախագահի խորհրդականի խոսքով` վերջին տաս տարիների ընթացքում ընդհանուր ամենացածր գնաճն արձանագրվել է 2016 թվականին` 0.4 տոկոս և 2009 թվականին` 0.9 տոկոս: Ամենաբարձր գնաճն արձանագրվել է 2011 թվականի առաջին եռամսյակում` 5.2 տոկոս, իսկ այս տարվա առաջին երեք ամիսներին արձանագրվել է 1.4 տոկոս գնաճ:
