«Առաջին լրատվական»- ի զրուցակիցն է «Մոդուս Վիվենդի» կենտրոնի նախագահ, քաղաքագետ Արա Պապյանը:
-Պարոն Պապյան, ներկայացրեք խնդրեմ Ձեր դիտարկումները Արցախում անցկացված սահմանադրական հանրաքվեի վերաբերյալ: Տեսանք, որ ընդդիմությունը դեմ է այս հանրաքվեին՝ պատճառաբանելով, որ դա մեկ անձի՝ մասնավորապես նախագահի մենիշխանությունը երկարաձգելու և նրա վերարտադրությունն ապահովելու միջոց է: Անկախ այդ հանգամանքից՝ հանրաքվեն տեղի ունեցավ և «այո»-ն ըստ էության վերջնական արդյունքում հաղթեց: Կարո՞ղ ենք ասել, որ ընդդիմությունը չկարողացավ ազդել ընտրությունների արդյունքի վրա:
-Նախ պետք է հիշենք, որ Հայաստանում ևս տեղի ունեցավ սահմանադրական փոփոխությունների կամ նոր Սահմանադրության վերաբերյալ հանրաքվե, և այդ ժամանակ իշխանությունները պնդում էին, որ խորհրդարանական համակարգին անցումը ավելի է համապատասխանում այն մարտահրավերներին, որի առջև կանգնած է Հայաստանը: Հիմա Հայաստանը՝ Արցախն էլ ներառյալ, նույն մարտահրավերների առաջ են, հետևաբար առաջին հերթին, եթե չբացատրենք մեկ անձի ցանկությամբ, անհասկանալի է դրա հակառակ միտումն ու Սահմանադրության փոփոխությունը Լեռնային Ղարաբաղի Հանրապետությունում, որտեղ կիսանախագահականից անցում է կատարվում նախագահական կամ սուպերնախագահական համակարգի: Բացի դրանից, հայտարարություններն այն մասին, որ անցումային շրջանից հետո գործող նախագահը կարող է, ինչպես մյուս բոլորը, մասնակցել ընտրություններին և ևս երկու անգամ ընտրվել նախագահ, ցույց է տալիս ընդդիմության մտահոգության լուրջ և հիմնավոր լինելը: Ես ևս կարծում եմ, որ սա պարզապես իշխանության վերարտադրության համար կատարված փոփոխությունն է, ինչպես որ Հայաստանում տեղի ունեցավ: Երկուսն էլ նույն նպատակի համար է արվել, որևէ այլ հիմնավորում, որևէ պատճառաբանություն չկա ավելորդ փողեր ծախսելու և այս լրջագույն պահին երկիրը ինչ-որ հանրաքվեների մեջ ներքաշելու համար, եթե ոչ վերարտադրվելու համար: Իսկ այն, որ ընդդիմությունը չկարողացավ հաղթել, դա բնական է, սովորաբար նման հասարակարգերում ընդդիմությունը չի կարողանում հաղթել, որովհետև հաղթում է այն ուժը, որն ունի քաղաքական իշանություն, ունի ֆինանսներ, ռեսուրսներ: Չմոռանանք, որ ԼՂՀ-ում կա մեկ հեռուստատեսություն, մամուլն էլ բազմազան չէ, փոքր հասարակություն է և նման հասարակություններում շատ հեշտ է մարդկանց վրա ազդեցության լծակներ գտնելը: Հայաստանն ինքը փոքր է, ուր մնաց նրա մաս հանդիսացող ԼՂՀ-ն: Իշխանությունները մեծ առավելություն ունեն, և իրենք հաղթեցին, և պիտի հաղթեին, այլընտրանք չկար:
Հարցազրույցն ամբողջությամբ՝ տեսանյութում:
