Սիրիայի հյուսիս-արևելքի քրդական գյուղերում կյանքն այժմ առհավետ բաժանված է «Ալ-Քաիդայի» գրոհայինների կողմից խաղաղ բնակիչների զանգվածային սպանություններից «առաջ» և «հետո»-ի: Գրոհայինները օգոստոսի 5-ի լույս 6-ի գիշերը հարձակվել են անպաշտպան բնակավայրերի վրա:
Մինչ այդ քրդական գյուղերի բնակիչները կարծում էին, որ գտնվում են թիկունքում՝ մարտական գործողություններից հեռու, հայտնում է RIA Novosti-ն:
Քրդստանի աշխատավորական կուսակցության մարտիկ Մամեդ Կուբանին հայտնել է, որ բնակիչների կեսը հասցրել է լքել գյուղը, սակայն ահաբեկիչներն իրենց հետ 315 պատանիների ու աղջիկների են տարել: Նրանք ցանկանում են նրանց փոխանակել իրենց պարագլխի հետ կամ խոստանում են վերադարձնել նրանց գլխատված մարմինները:
Նրա խոսքով՝ քրդական գյուղերի վրա հարձակումը եղել է սիրիական հակակառավարական խմբավորումների գրոհայինների պատասխանը վերջերս Քրդստանի աշխատավորական կուսակցության կողմից անցկացված բարեհաջող գործողություններից մեկին, որի արդյունքում պատանդվել էր «Իսլամական պետությունն Իրաքում և Սիրիայում» խմբավորման «էմիրը»:
«Նրանք չեն կարող բացեիբաց կռվել մեր դեմ, քանի որ Քրդստանի աշխատավորական կուսակցությունը լավ զինված է և հիանալի նախապատրաստված, ահա թե ինչու է օգտվում թույլ տեղերից»,- վստահ է Մամեդը:
Սիրիայի քրդական գյուղերի արյունալի իրադարձությունները ցասման ալիք են բարձրացրել Իրաքի քրդերի շրջանում: Նրանք հայտնել են, որ մտադիր են ներխուժել սիրիական տարածք՝ ահաբեկիչներից տեղի քրդերին պաշտպանելու համար:
