Թուրքական Anadolu լրատվական գործակալության փոխանցմամբ՝ Թուրքիայի նախագահ Ռեջեփ Էրդողանը ՏԻՄ ղեկավարների հետ հանդիպման ժամանակ անդրադարձել է նաև Սիրիայի Հալեպ քաղաքում տիրող իրավիճակին.
«Հալեպի եղբայրների առջև Թուրքիայի պարտքը տվյալ տարածաշրջանում պատերազմի հրդեհը մարելն է։ Հալեպի նահանգը սահմանակից է Թուրքիայի Գազիանթեփ ու Քիլիս նահանգներին։
Եթե սկսվի գաղթի նոր ալիք, ապա Թուրքիայի տարածքում կհայտնվի առնվազն 1 միլիոն մարդ»։ Էրդողանն այդ համատեքստում հիշատակել է նախօրեին Ռուսաստանի նախագահ Վլադիմիր Պուտինի հետ ունեցած հեռախոսազրույցը.
«Մենք քննարկել ենք Հալեպում տիրող իրավիճակը։ Պուտինն ընդգծեց, որ Ռուսաստանի օդատիեզերական ուժերը դադարեցրել են Հալեպի ռմբակոծությունը, և մեզ խնդրեց աջակցել այդ տարածաշրջանից Ջաբհաթ ան-Նուսրայի զինյալների դուրս բերմանը։
Մենք արդեն իսկ անհրաժեշտ ցուցումներ ենք տվել այդ հարցի շուրջ։ Մենք Ռուսաստանի նախագահի հետ պայմանավորվել ենք Հալեպից Ան-Նուսրայի դուրս բերման և քաղաքի բնակիչների անվտանգությունը ապահովելու հարցում»։