Այսօր Վիկտոր Դալլաքյանը հայտարարեց, որ հրաժարական է տալիս ՀՀ նախագահի աշխատակազմի ղեկավարի տեղակալի ու ԱԺ-ում նախագահի մշտական ներկայացուցչի պաշտոններից: Բացի դրանից՝ Դալլաքյանը նշեց, որ ինքը դուրս է գալիս ՀՀԿ-ից և այսուհետ վերադառնում է ակտիվ քաղաքականություն:
ԱԺ ՀՀԿ խմբակցության քարտուղար Գագիկ Մելիքյանը «Առաջին լրատվական»- ի հետ զրույցում անդրադառնալով կուսակցի հայտարարություններին, նշեց, որ չի կարծում, թե այն քայլերը, որ ձեռնարկում է Վ. Դալլաքյանը, ակտիվ քաղաքականություն մուտք գործելու համար նրան որևէ դիվիդենտ կբերի. «Հակառակը, նման գործիչներին վաղուց մոռացել են, քաղաքական դաշտ վերադառնալու նրա հայտը, քաղաքական ցնցումներ, ինչպես իրեն էր թվում, չի առաջացնի: ժողովուրդը շատ լավ հիշում է, թե ով ով է, ով ինչ ճանապարհ է անցել»:
Անդրադառնալով դիտարկմանը, որ Վ. Դալլաքյանը ՀՀԿ խորհրդում էր, Գ. Մելիքյանը նշեց, որ նա ՀՀԿ խորհուրդ մտել է այն ժամանակ, երբ ակտիվ քաղաքական գործիչ էր. «Բայց այն ճանապարհը, որ նա անցավ վերջին մի քանի տարիներին, նրան տարավ դեպի մոռացվածության դաշտ: Վիկտոր Դալլաքյանը Վանաձորում ազատ մրցակցային դաշտում պարտվեց Էդմոն Մարուքյանին»:
Դրանից հետո ՀՀԿ-ն այուամենայնիվ նրան սատարեց, Ս. Սարգսյանը Վ. Դալլաքյանին նշանակեց նախագահի աշխատակազմի ղեկավարի տեղակալ և իր ներկայացուցիչը ԱԺ-ում: Եվ այսօր Վիկտոր Դալլաքյանը հայտարարեց, որ 4 տարի լինելով նախագահի ներկայացուցիչը, չի հանդիպել նրան: Անդրադառնալով այս դիտարկմանը Գ. Մելիքյանն ասաց, որ ընտրություններից հետո Վ. Դալլաքյանին տրվեց ևս մեկ շանս՝ դրսևորելու իրեն, սակայն նա չկարողացավ օգտագործել. «Այդ դաշտում նույնպես նա տապալված է»:
Վ. Դալլաքյանն ասում էր, որ Ս. Սարգսյանը խաղամոլ է, դրանից հետո դառնում է ՀՀԿ անդամ և զբաղեցնում է այսպիսի բարձր պաշտոն: Ինչո՞ւ տրվեց նրան այդ շանսը: Այս հարցին ի պատասխան ՀՀԿ խմբակցության քարտուղարը նշեց, որ ՀՀ նախագահը ցանկանում է բոլորին հնարավորություն տալ ուղղվելու, և Վ. Դալլաքյանը այդ շանսը ևս ճիշտ չoգտագործեց:
«Վիկտոր Դալլաքյանը քաղաքականությունը երևի ճիշտ չի ընկալել, կա նման արտահայտություն՝ «քաղաքականությունն անբարոյականություն է»: Կարծում եմ, որ Վիկտոր Դալլաքյանը այդ արտահայտությունն ուղղակի է ընդունել»,- ընգծեց Գ. Մելիքյանը:
Մանրամասները՝ տեսանյութում:
