Ղարաբաղյան հիմնախնդրի կարգավորման բանակցություններում ամռանը տեղի ունեցած մի քանի հանդիպումներից հետո վերջին շրջանում որևէ լուրջ տեղաշարժ չկա: Թերևս, դրական տեղաշարժ կարող ենք համարել միայն շփման գծում ստեղծված հարաբերական անդորրը: Ժամանակ առ ժամանակ լինում են միայն միջնորդների՝ Մինսկի խմբի համանախագահող երկրների հայտարարությունները Հայաստանի և Ադրբեջանի նախագահների, նախարարների միջև հանդիպում կազմակերպելու, բանակցություններն ակտիվացնելու մասին: Այս համապատկերում օրերս Ղարաբաղյան հիմախնդրին է անդրադարձել ԱՄՆ պետքարտուղար Ջոն Քերրին՝ հայտարարելով, որ Ղարաբաղյան սառեցված հակամարտության կարգավորման համար առայժմ չեն ստեղծվել պայմաններ, ինչի պատճառն այն է, որ երկու երկրների ղեկավարները պատրաստ չեն դրան: Սա պարզապես հերթապահ հայտարարություն էր ԱՄՆ-ի կողմից, թե՞ այն նաև արտացոլում է բանակցային գործընթացի ներկայիս վիճակը: Ի՞նչ ուղերձներ է պարունակում՝ ուղղված գործընկեր պետություններին, օրինակ՝ Ռուսաստանին, որի հետ հարաբերություններն այսօր բավական լարված են, կամ ուղղված հակամարտող կողմերին: Թեմայի շուրջ «Առաջին լրատվական»- ը զրուցել է Կովկասի ինստիտուտի փոխտնօրեն, քաղաքագետ Սերգեյ Մինասյանի հետ:
-Պարոն Մինասյան, ինչպես կմեկնաբանեք Ջոն Քերրիի հայտարարությունը և դրան նախորդած հայտարարությունները Մինսկի խմբի համանախագահների կողմից, պաշտոնական Երևանի, Բաքվի մեկնաբանությունները բանակցությունների վերաբերյալ:
-Նախևառաջ Քերրիի այդ հայտարարությունը մեկնաբանելու համար, որը շատ կարճ է, բայց չափազանց բովանդակալից, պետք է հասկանանք, թե ինչ համատեքստում և որտեղ է արել պարոն Քերրին իր հայտարարությունը:
Այն, ինչ որ ասաց Քերրին, լիովին համապատասխանում է այն քաղաքական իրականությանը, որ կա և պահպանվում է ղարաբաղյան հակամարտության շուրջ: Այն, ինչ-որ ասել էր Քերրին, վերաբերում է ոչ միայն Ադրբեջանի և Հայաստանի ղեկավարների դիրքորոշմանը, այլ նաև այն փաստին, որ ղեկավարներն արտացոլում են հասարակության դիրքորոշումը: Այո՛, դա գաղտնիք չէ, Հայաստանի և Ադրբեջանի հասարակությունները դեռ պատրաստ չեն խաղաղության և փոխզիջումների: Դա իրականություն է, և դրա մասին է ասել Քերրին: Նաև նշում է, որ բանակցային գործընթացը, որ Մինսկի խմբի համանախագահներն իրագործում են, դա այս պահին հանդիսանում է բանակցություններ բանակցությունների համար, և ավելի շատ կոնֆլիկտ մենեջմենթ է, այսինքն՝ հակամարտության ոչ թե կարգավորման, այլ վերահսկման մեխանիզմներ են կիրառվում: Մինսկի խմբի ԱՄՆ համանախագահ Ուորլիքը «Ինտերֆաքս»-ին տված վերջին հայտնի հարցազրույցում իրականում նաև այդ մասին ասաց: Չնայած Ուորլիքը կամ երբեմն այլ համանախագահներ երբեմն ուշագրավ հայտարարություններ են անում, բայց կա նաև ամենօրյա աշխատանքը, աշխատանքի բնույթը իր մեջ ներառում է օպտիմիզմի արտացոլումը: Հասկանալի է, որ այդ հանդիպումները ոչ թե հակամարտության լուծման, այլ կառավարման առումով կարևոր են: Լինելով ԱՄՆ պետքարտուղար, Քերրիի մեկ նախադասությունը ավելի մեծ արժեք և իմաստ ունի, քան տասնյակ այլ մակարդակի քաղաքական գործիչների հայտարարությունները:
–Այսինքն՝ Ջոն Քերրի հայտարարությունը այն մասին, որ առայժմ պայմաններ չկան խնդիրը լուծելու համար, ինչ–որ հատուկ ուղերձներ չէ՞ր պարունակում:
-Դա հատուկ ուղերձ չէր, պարզապես Քերրին այս կամ այն աստիճանի իր հայտարարությունում անդրադառնում էր միջազգային քաղաքականության կարևոր հարցերին, և քանի որ ԱՄՆ-ը Մինսկի խմբի համանախագահ երկիր է և զբաղվում է Ղարաբաղյան հակամատության հարցով, ապա նաև մեկ նախադասությամբ անդրադարձավ դրան:
Հարցազրույցն ամբողջությամբ՝ տեսանյութում:
