Նորանշանակ գլխավոր դատախազ Արթուր Դավթյանը նշել է, որ Մարտի 1-ի գործի բացահայտումը իր գործունեության մեջ առաջնահերթություններից է լիելու: Մարտի 1-ի զոհ Գոռ Քլոյանի հարը՝ Սարգիս Քլոյանը, սակայն, նոր դատախազի հետ հույս չի կապում և չի հավատում այս խոստմանը: «Կարող ենք ասել, որ դատախազի թեկնածուն այս խոստումը տվեց, բայց սա փիար է, որ քվեարկեն իր օգտին: Մենք չենք հավատում և չենք վստահում: Ես ինը զոհերի իրավահաջորդների կողմից կարող եմ ասել, որ չենք հավատում ո՛չ դատախազությանը, ո՛չ էլ Հատուկ քննչական ծառայությանը, որովհետև անցել է 8 տարի 6 ամիս, ոչ մի առաջընթաց չկա, տեղյակ չեն պահում, թե ինչ փուլի են հասել, ինչ է լինելու վերջը, խաբում են ու խաբում»,- «Առաջին լրատվական»- ի հետ զրույցում ասաց Ս. Քլոյանը:
Նրա խոսքով՝ նախորդ դատախազ Գ. Կոստանյանը ևս խոստացել է, որ սայլը տեղից կշարժվի, ճանապարհային քարտեզ է բացել, առանձնացրել գործը, և այդպես էլ ամեն ինչ մնացել է թղթի վրա:
«Մենք ընդամենը մեկ հույս ունենք. երբ որ լինի իշխանափոխություն, ամեն ինչ իր տեղը կընկնի, և կբացահայտվեն բոլոր սպանությունները»,- ընդգծեց Սարգիս Քլոյանը:
Մանրամասները՝ տեսանյութում:
