ԴԱԻՇ ահաբեկչական խմբավորման նախկին սեքս-ստրկուհի, 23-ամյա եզդի Նադիա Մուրադ Բասի Թահան դարձել է ՄԱԿ-ի բարի կամքի դեսպան մարդկանց առևտրից տուժածների հարցերով։ Այս մասին հայտնում է Al Arabiya-ն։
Նադիան ստրկության մեջ անցկացրել է 3 ամիս։ Նրան 2014 թվականի օգոստոսին տարել են հայրենի իրաքյան գյուղից, որը գտնվում է Սինջարից ոչ հեռու, և տեղափոխել Մոսուլ, որտեղ բազմիցս ենթարկվել է խմբակային բռնաբարության։ Հայտնի է նաև, որ նրան մի քանի անգամ վերավաճառել են։
Նադիան ելույթով հանդես է եկել ՄԱԿ-ում։ Նա արդեն իր համար նպատակներ է ընտրել, որոնք մտադիր է իրագործել որպես բարի կամքի դեսպան։ Առաջին հերթին նա ցանկանում է կենտրոնանալ մարդկանց առևտրի զոհերի խղճալի վիճակի մասին իրազեկվածության բարձրացման վրա։
Ելույթի ժամանակ նա բոլոր աշխատակիցներին կոչ է արել ներդնել բոլոր հնարավոր ջանքերը՝ սեքս-ստրկությունից ազատելու մյուս աղջիկներին ու կանանց։ «Բախտս բերեց, ես կարողացա փախչել։ Սակայն սեքս-ստրկության մեջ շարունակում են մնալ վիթխարի թվով կանայք ու աղջիկներ։ Մենք չպետք է նման բան թույլ տանք»,- ասել է նա։
