“Իսկ ի՞նչ, եթե պաղեստինցիները, անտեսելով բանակցությունները, պետություն հռչակեն”,- հարց է տալիս հոդվածագիրը` Հովարդ Լաֆրանչին եւ հետո ավելացնում, որ դա տարբերակներից մեկն է, որը քննարկում են պաղեստինցիները՝ ի հակակշիռ Նաթանյահուի վերջերս արված առաջարկների: Իսկ Իսրայելի վարչապետն առաջարկել է հրեական պետության ճանաչման դիմաց եւս մի որոշ ժամանակով երկարեցնել Արեւմտյան ափում իրականացվող շինարարական աշխատանքները: Հոդվածագրի խոսքով, դրանով Նաթանյահուն գնդակը տեղափոխել է պաղեստինցիների դաշտ եւ հող է նախապատրաստում, որպեսզի բանակցությունների ձախողման դեպքում ողջ պատասխանատվությունը դրվի վերջիններիս վրա:
Հոդվածագիրը նաեւ հիշեցնում է, որ Լիբիայում կայացած Արաբական երկրների լիգա կազմակերպության խորհրդաժողովի ժամանակ նախատեսվում էր Պաղեստինում պետության միակողմանի հռչակում: Մյուս տարբերակը, որ քննարկվում է, կապված է ՄԱԿ-ում իրավական պարտադիր որոշման կայացման հետ, քանի որ բանակցությունները ոչ մի արդյունք չեն տալիս:
Ըստ հոդվածագրի՝ պետություն հռչակելուց հետո մի շարք իրավական եւ քաղաքական խնդիրներ անմիջապես կառաջանան. դրանցից է 500 հազ իսրայելցիների կարգավիճակի հարցը պաղեստինյան տարածքներում: Հնարավոր է նաեւ ճգնաժամ առաջանա ՄԱԿ-ի անվտանգության խորհրդում, որն ավելի վաղ իսրայելական բնակավայրերն անօրինական էր հայատարարել: Հոդվածագրի խոսքերով, դեռ պարզ չի պաղեստինցիներն այս սցենարներից որ մեկը կօգտագործեն, թե նրանք պարզապես «բլեֆ» են անում: