Շվեյցարական Օբերվիլ-Լիլի կոմունայի բնակիչները հրաժարվել են ընդունել քվոտայով սահմանված 10 ներգաղթյալների՝ հայտնում է The Independent-ը:
Այդ հարցով անցկացված հանրաքվեի ժամանակ բնակիչների 52%-ը պատասխանել է, որ ավելի շուտ տուգանք կվճարեն՝ մոտ 263 հազար եվրո: Ինչպես նշում է պարբերականը՝ առողջարանային գյուղի 2200 բնակիչներից 300-ը միլիոնատերեր են:
Պարբերականը մեջբերում է տեղի բնակիչներից մեկի խոսքը, ով հայտարարել է, որ ողջ կյանքում չի աշխատել նրա համար, որ «ինչ-որ մեկը գա և փչացնի իրենց սիրելի գյուղը»:
Օբերվիլ-Լիլիի գյուղապետը հերքել է մեղադրանքները, թե դա այլազգի մարդկանց նկատմամբ ատելության դրսևորում է: Նա պարզաբանել է, որ իրենք դեմ չեն օգնել սիրիացի փախստականներին, սակայն նրանց համար ավելի լավ է այդ օգնությունը ստանալ ճամբարներում՝ իրենց տներից ոչ հեռու:
