Մեկ տարի առաջ պատգամավորներ Ռուբիկ Հակոբյանի և Թևան Պողոսյանի նախագիծը, որով առաջարկ էր արվում հանել տարկետման իրավունքը, վերջին օրերին կրկին քննարկման առարկա է դարձել: Ըստ նախագծի՝ 18 տարին բոլորած տղաները, անկախ այն հանգամանքից վճարովի, թե անվճար համակարգում են սովորում, պետք է զորակոչվեն բանակ: Նախորդ շաբաթ Ազգային ժողովի նիստի ժամանակ կառավարության աշխատակազմի ղեկավար-նախարար Դավիթ Հարությունյանն անդրադարձավ նախագծին՝ առաջարկելով սպասել երկու շաբաթ, քանի որ նախագծի լրամշակված տարբերակը նախատեսվում է ներկայացնել խորհրդարանի քննարկման: Կրթության և գիտության նախարարությունում նախագիծը հալած յուղի տեղ չեն ընդունել, չնայած հասկանում են պատգամավորների մտահոգությունը:
«Օրենքը, որ գործում է այսօր, արդար չէ,- կարծում է նախարարը:- Եթե ընդունվել ես պետպատվերով, չես զորակոչվում բանակ: Զորակոչվում են միայն վճարովի համակարգ ընդունվածները»:
Լևոն Մկրտչյանը նախագծի այլընտրանքային տարբերակ է փնտրում: Առաջարկները, որ առաջիկայում պետք է ներկայացվեն հանրությանը, դեռ խմորման փուլում են:
Պետք է մշակել այնպիսի մեխանիզմ, որ բանակից վերադառնալուց հետո ուսանողը շահ ունենա շարունակելու կրթությունը, կարծում է նախարարը, ապա մատնանշում նախագծի խոցելի կողմերը:
«Եթե հումանիտար մասնագիտությամբ սովորողները կարող են ժամանակավորապես կտրվել կրթությունից, բնագիտական մասնագիտությունների դեպքում բարդ գործ է,- կարծում է կրթության և գիտության նախարարը:- Պետք է մտածել մի ձևաչափ, որ չկտրվելով գիտությունից, թույլ կտա կատարել մասնագիտական պարտականությունը»:
