Այսօր երեկոյան Շվեդիայի Մալմյո քաղաքում «Եվրատեսիլ-2013» երգի մրցույթում հանդես կգան երկրորդ կիսաեզրափակիչ փուլի մասնակիցները: Համերգը տեղի կունենա Malmo Arena համալիրում:
Երկրորդ կիսաեզրափակչում հանդես կգան 17 երկրների խմբեր ու անհատ կատարողներ, որոնց թվում են Լատվիայի, Սան Մարինոյի, Մակեդոնիայի, Ադրբեջանի, Ֆինլանդիայի, Մալթայի, Բուլղարիայի, Իսլանդիայի, Հունաստանի, Իսրայելի, Հայաստանի, Հունաստանի, Նորվեգիայի, Ալբանիայի, Վրաստանի, Շվեյցարիայի, Ռումինիայի ներկայացուցիչները:
Առաջինը բեմ կբարձրանա լատվիական PeR խումբը, ապա Սան Մարինոյի ներկայացուցիչ Վալենտինա Մոնետտան, այնուհետև մակեդոնացիներ Վլատկո Լոզանոսկին ու Էսմա Ռեջեփովան: Ադրբեջանցի մասնակիցը՝ Ֆարիդ Մամեդովը, հանդես կգա 4-րդ համարի ներքո, իսկ ֆինն երգչուհի Քրիստա Սիեգֆրիդսը՝ 5-րդ համարի:
Երկրորդ հնգյակը կբացի Մալթայից Ջանլուկա Բեզինան, ապա հանդես կգա բուլղարական դուետը՝ Ելիզա Տոդորովան ու Ստոյան Յանկուլովը, որոնցից հետո բեմ կբարձրանա Իսլանդիայի ներկայացուցիչ Էյտոուի Ինգի Գյունլյոգսոնը: Նրանց կհետևեն Koza Mostra-ն ու Աղաֆոնաս Յակովիդիսը՝ Հունաստանից: 10-րդ համարի ներքո հանդես կգա Իսրայելը ներկայացնող Մորան Մազորը:
Առաջինը երկրորդ տասնյակում հանդես կգա Հայաստանը ներկայացնող «Դորիանս» խումբը, ապա ելույթ կունենա Հունգարիայից ByeAlex-ը, նորվեգուհի Մարգարեթ Բերգերը հանդես կգա 13-րդ համարի ներքո, նրան կհաջորդեն Ալբանիան ներկայացնող Ադրիան Լյուլգյուրայն ու Բլեդար Սեյկոն: Այնուհետև ելույթ կունենան վրացի արտիստներ Սոֆո Գելովանին ու Նոդիկո Տատիշվիլին: Նրանցից հետո ելույթ կունենան շվեյցարական Takasa խումբը ու ռումինացի երգիչ Չեզարը:
Երկրորդ կիսաեզրափակչում համերգի կազմակերպիչները կազմակերպել են շքեղ բացում՝ շվեդ երգիչներ Կառլսոն Ագնեսի ու Դարինայի, ինչպես նաև բայքերների ու պարողների մասնակցությամբ՝ տեղեկացնում է RIA Novosti-ն:
Հեռուստադիտողների քվեարկությամբ ու պրոֆեսիոնալ ժյուրիի որոշմամբ կընտրվի մրցույթի կատարողների վերջին տասնյակը, որոնք կանցնեն եզրափակիչ:
Մրցույթի եզրափակիչ փուլը տեղի կունենա մայիսի 18-ին՝ Մալմյոյում:
