Այսօր Ֆրանսիայի հարավում կբացվի ժամանակակից կինեմատոգրաֆիայի ամենաազդեցիկ և խոշոր ստուգատեսներից մեկը: Այս տարի Կաննի կինոփառատոնը կանցկացվի 66-րդ անգամ և կավարտվի մայիսի 26-ին: Այս մասին հայտնում է ITAR-TASS-ը:
Փառատոնին մասնակցում է 52 լիամետրաժ գեղարվեստական ֆիլմ: Գլխավոր մրցույթում, որի հաղթողը կստանա «Արմավենու ոսկե ճյուղ», ընդգրկված է 20 ֆիլմ:
Գլխավոր մրցույթում առավել մեծ թվով ֆիլմեր են ներկայացրել ԱՄՆ-ն ու Ֆրանսիան՝ 5-ական: Ճապոնիան ներկայացրել է 2 ֆիլմ: Մեկական ֆիլմեր են ներկայացրել Իտալիայի, Չադի, Չինաստանի և Հոնկոնգի, Նիդերլանդների, Մեքսիկայի, Լեհաստանի ու Դանիայի ռեժիսորները:
Ֆիլմերի մեծ մասը տեսել է միայն Կաննի փառատոնի ընտրական խումբը, մասնագետները նույնիսկ դժվարանում են անվանել գլխավոր հավակնորդներին:
Հաղթողին ընտրում է 9 հոգուց կազմված ժյուրին, որը կգլխավորի հայտնի ամերիկացի ռեժիսոր Սթիվեն Սփիլբերգը: Ժյուրիի կազմում են Նիկոլ Քիդմանը, ավստրալացի դերասան Քրիստոֆ Վալցը , ծագումով չինացի ամերիկացի ռեժիսոր Էնգ Լին և այլք:
«Ես դեմոկրատ կլինեմ: Սակայն ինձ ժամանակ է պետք նոր դերին հարմարվելու համար, քանի որ վերջին անգամ փառատոնի ժյուրիի կազմում եմ եղել 1976 թվականին»,-փառատոնի բացման նախօրեին հայտարարել է Սփիլբերգը:
Փառատոնի՝ նշանակությամբ երկրորդ մրցույթը՝ «Հատուկ հայացքը», ներառում է 17 ֆիլմ:
Այսօր ուշ երեկոյան փառատոնը կբացի ավստրալացի ռեժիսոր Բազ Կուրմանի «Մեծ Գեթսբի» ֆիլմը, որը նկարահանվել է Ֆրենսիս Սկոտ Ֆիցջերալդի վեպի հիման վրա: Ֆիլմում գլխավոր դերով հանդես է գալիս Լեոնարդո դի Կապրիոն:
