Բահրեյնի ընդդիմությունն այսօր մայրաքաղաքի մերձակայքում բազմահազարանոց միտինգ է կազմակերպել՝ իշխանություններից պահանջելով դադարեցնել բանտերում գտնվող քաղբանտարկյալների կտտանքները:
Ակցիան տեղի է ունեցել Դաիխ բնակավայրում, որտեղ բնակվում են շիաները: Ցուցարարները խաղաղ երթ են անցկացրել: «Բահրեյնում, որտեղ շարունակվում է պայքարը ժողովրդավարական բարեփոխումներ պահանջող քաղաքական մեծամասնության և ցանկացած փոփոխություն մերժող բռնապետության միջև, ուժային կառույցներում կիրառվող կտտանքներն արդեն արմատավորվել են»,- ասվում է «Համաձայնություն» ազդեցիկ քաղաքական կոալիցիայի հայտարարության մեջ:
Իրավապաշտպանների տվյալներով՝ քաղաքական նկատառումներով Բահրեյնի բանտերում ընդդիմության 80 ակտիվիստներ են պահվում: Անցած շաբաթ գործող ռեժիմի հակառակորդները քաղբանտարկյալներին ազատ արձակելու պահանջով ցույց էին կազմակերպել:
Փետրվարին Բահրեյնում և մի շարք այլ արաբական պետություններում հակակառավարական ալիք էր բարձրացել: Իրադրությունը գնալով բարդանում է, քանի որ թագավորության բնակչության մեծամասնությունը շիաներ են, իսկ իշխանության գլխին սունիներն են կանգնած:
