Ինչպես «Առաջին լրատվական»-ին փոխանցում են Շիրակի մարզպետարանից, Ամանորի առաջին հինգ օրերը սկսվել են բոլորի համար այնքան բերկրալի լուրերով` մարզում գրանցված ծնունդներով: Հունվարի 1-5-ը Շիրակի մարզում ծնվել է 59 երեխա՝ 34 աղջիկ և 25 տղա, ընդ որում՝ Գյումրու ծննդատանը՝ 19 երեխա (15 աղջիկ, 4 տղա), Գյումրու Ավստրիական մանկական հիվանդանոցում՝ 13 երեխա (8 տղա, 5 աղջիկ), Ախուրյանի մոր և մանկան հիվանդանոց՝ 19 երեխա (10 տղա, 9 աղջիկ), Արթիկի մոր և մանկան առողջության կենտրոն՝ 8 երեխա (5 աղջիկ, 3 տղա):
«Առաջին լրատվական»-ը շնորհավորում է մեր բալիկներին և նրանց ծնողներին՝ մաղթելով առողջություն, երջանկություն և ամենայն բարիք:
Ամանորի հինգ օրերին Շիրակի մարզում՝ ներառյալ Գյումրի քաղաքում գրանցված արտակարգ պատահարների պատկերը հետևյալն է. մարզային փրկարար ծառայությունում գրանցվել է 8 դեպք: Շմոլ գազի հետևանքով 1 թունավորում է եղել, տուժողի վիճակը բավարար է, դուրս է գրվել հիվանդանոցից: Այս օրերին տեղի է ունեցել 1 ճանապարհատրանսպորտային պատահար և 6 արգելափակման դեպք, մարզի տարբեր հատվածներում արգելափակումից դուրս է բերվել 28 ավտոմեքենա, 75 ուղևոր:
Մարզի շատ ճանապարհներ, կապված բքի հետ, մնում են դժվարանցանելի՝ չնայած իրականացվող մաքրման աշխատանքներին:
Գյումրու բժշկական կենտրոն առաջին հինգ օրերին ընդունվել է 57 հիվանդ, որոնցից 20-ը՝ սիրտանոթային, 10-ը՝ վիրաբուժական, 6-ը՝ վերակենդանացման, 13-ը՝ թերապևտիկ և 4-ը՝ վնասվածքաբանության բաժանմունք:
Գյումրու ինֆեկցիոն հիվանդանոց տեղափոխվել է երեք հիվանդ, որոնցից երկուսը՝ սուր ռեսպիրատոր վիրուսային, մեկը՝ սուր աղիքային ինֆեկցիա ախտորոշմամբ:
Անցած հինգ օրերին այնքան էլ ծանրաբեռնված չի աշխատել Գյումրու շտապ բուժօգնության կայանը. գրանցվել է հիպերտոնիկ կրիզի 112, սիրտանոթային՝ 18, ջերմության՝ 39, անգինայի՝ 14, տրավմաների՝ 22, բրոնխիալ ասթմայի՝ 11, իսնուլտի՝ 2, ինֆարկտի՝ 5, շաքարային դիաբետի՝ 3, թոքի քաղցկեղի՝ 2 և մահվան 3 կանչ (առաջին հինգ օրերին գրանցվել է մահվան 28 դեպք), ընդամենը` 231 կանչ հինգ օրում: Հուսանք և ցանկանանք, որ մեր շտապբուժօգնության կայաններն ամբողջ տարին աշխատեն նման ծանրաբեռնվածությամբ:
Անցած հինգ օրերին համեմատաբար հանգիստ է եղել նաև ոստիկանությունում. գրանցվել է 25 դեպք, որից ճանապարհատրանսպորտային՝ 4, մարմնական վնասվածք հասցնելու՝ 6, դժբախտ պատահարի՝ 4, թունավորման՝ 2, հանկարծամահության՝ 3, ինքնավնասման՝ 2 և ծեծի 1 դեպք: Հետախուզման մեջ է գտնվում երեք անձ:
