Ինֆորմացիայի ազատության կենտրոն և Կովկասյան ինստիտուտ ՀԿ-ները Երևանի ավագանու ընտրությունների քարոզարշավի սկսելուն զուգահեռ՝ ապրիլի 7-ից անցկացնում են հինգ էլեկտրոնային կաքերում՝ tert.am, slaq.am, news.am, 1in.am, asekose.am, նախընտրական քարոզարշավի լուսաբանման վերլուծություն:
Այսօր վերոնշյալ ՀԿ-ները լրագրողներին ներկայացրեցին ընթացիկ հաշվետվություն: Կովկասյան ինստիտուտի հետազոտող Հրանտ Միքաելյանն ասաց, որ այս մոնիթորինգում օգտագործվում է որակական հետազոտության մեթոդաբանությունը, որը հիմնված է դիսկուրս վերլուծության վրա: ԶԼՄ-ի կողմից ներկայացված նյութի միջոցով փորձագետները պարզել են, թե տվյալ նյութը ունի՞ կուսակցությունների, թեկնածուների հանդեպ կանխակալ վերաբերմունք:
Փորձագետ Տաթև Սարգսյանն էլ հավելեց, որ չորս կուսակցությունների ԶԼՄ-ները ներկայացնում են որպես ընդդիմադիր, սակայն չորսից ԲՀԿ-ն բացահայտ չի ընդունում, որ ընդդիմություն է. «Պետք է նշեմ, որ ըստ լուսաբանման՝ ՀՅԴ-ն առաջին անգամ հրաժարվել է գաղափարախոսական քարոզարշավից, ինչպես նաև՝ քաղաքի և երկրի խնդիրները լուսաբանվում են շատ չնչին, ընդհանուր բաներ են ասվում, սակայն ընտրողներին չեն մանրամասնում ծրագրերը»:
Լուսաբանման հետ կապված՝ Կովկասյան ինստիտուտի հետազոտող Նինա Իսկանդարյանն էլ հավելեց, որ իրենց կողմից ընտրված ԶԼՄ-ներում գրեթե միշտ ներկայացվում է նույնանման ինֆորմացիա. «Օրինակ, news.am-ը տալիս է շատ կարճ ինֆորմացիա, դրան հակառակ՝ 1in.am-ը ավելի մանրամասն և վերլուծաբար է լուսաբանում»:
Նշենք, որ հինգ կայքերն ընտրվել են ըստ դիտումների քանակի:
Մանրամասները կարող եք դիտել տեսանյութում:
