Սպիտակ տան վարչակարզմի ղեկավար Դենիս Մակդոնան և նախագահ Բարաք Օբամայի թիմի մյուս անդամները երեքշաբթի նահանգապետերի հետ քննարկել են միգրացիոն քաղաքականության հարցերը, մասնավորապես՝ Սիրիայից փախստականների ընդունման հարցը: Այս մասին գրում է RIA Novosti-ն:
Քննարկումը տեղի է ունեցել մի շարք նահանգապետերի և կոնգրեսականների ելույթների ֆոնին՝ ընդդեմ ԱՄՆ-ում 10 հազար սիրիացի փախստականների տեղավորելու ծրագրի: Նրանք այդ հարցում քաղաքականության վերանայման առիթ են համարում Փարիզի ահաբեկչությունները՝ մտահոգություն ունենալով, որ փախստականների մեջ կարող են լինել ահաբեկիչներ:
«Պաշտոնական անձինք կրկնել են, որ նախագահը պարզ հասկացրել է՝ իր համար գլխավորը մնում է Ամերիկայի ժողովրդի անվտանգությունը: Ահա թե ինչու նույնիսկ եթե ԱՄՆ-ը ընդունի շատ փախստականների, այդ թվում՝ Սիրիայից, մենք դա կանենք միայն մանրակրկիտ ստուգումներից հետո»,-ասվում է Սպիտակ տան հաղորդագրությունում:
