Կարևորն այն է, որ հաջողվեց մեծ բախումներից խուսափել, որովհետև բոլորի մեջ կար 2008 թվականի մարտի մեկի հետ կապված մտավախությունը: «Առաջին լրատվական»-ի հետ զրույցում ասաց ՌԱՀՀԿ փորձագետ Մանվել Սարգսյանը, ով երեկ ներկա էր Բաղրամյան պողոտայում հանրահավաքի մասնակցիների և ոստիկանների բախմանը։
«Առաջինը՝ պետք է արձանագրել այն, որ շեղումներ եղան նախապես ծրագրված պլաններից՝ կապված երթի հետ: Հետո՝ ոստիկանությունը որոշել էր ճանապարհը փակել՝ չգիտեմ ինչ իրավունքով նախագահական նստավայրից այդքան մեծ հեռավորության վրա։ Արդյունքում ստեղծվեց խցանում՝ հազարավոր մարդիկ կային, ոստիկանությունը մեծ ուժ գործադրեց, ամեն կերպ փորձում էր ներկայացնել, որ այդ երթը օրինական չէ և պետք է ցրել: Փորձեր արվեցին անգամ բրդել ժողովրդին, բայց երևի հասկանալով, որ դա ճնշելու ձև չէ, այլ պրոցեսի մեջ մտան, որն ավելի բարդացրեց վիճակը: Հետո՝ ժողովրդի մեծ մասը լավ իրազեկված չէր, մի մասն էլ չընդունեց Ծիծեռնակաբերդ գնալու որոշումը, ինչն էլ դժվար կառավարելի դարձրեց իրավիճակը Բաղրամյան պողոտայի վրա՝ նաև նրանց համար, ովքեր փորձում էին համակարգել այդ իրավիճակը՝ Արմեն Մարտիրոսյանին, Անդրիաս Ղուկասյանին:
Ոստիկանները հայտարարեցին, որ 15 րոպից հետո ուժ կկիրառեն,բայց իրենք էլ, ըստ երևույթին, հասկացան, որ դա կարող է մեծ բարդությունների հանգեցնել, որովհետև շատ վճռական էր տրամադրված ժողովուրդը»,- մեկնաբանեց նա:
Մեր այն հարցին, թե արդյո՞ք հիասթափեցնող չէր այն հանգամանքը, որ Րաֆֆի Հովհաննիսյանը ժողովրդին թողեց Բաղրամյան պողոտայի վրա, իսկ ինքը ոստիկանապետի հետ գնաց Ծիծեռնակաբերդ, Մանվել Սարգսյանը պատասխանեց. «Մի մասն ուղղակի համաձայն չէր գնալ այդտեղից Ծիծեռնակաբերդ, գուցե մի մասն ուղղակի ճիշտ չէր ընկալել իրավիճակը:
Ես ուղղակի հասկացա, որ ոստիկանությունը որոշել էր մասնատել ժողովրդին:
Րաֆֆի Հովհաննիսյանը հասկացավ, որ շատ բարդ իրավիճակ է ստեղծվել, այդ պատճառով էլ գնաց այլ ճանապարհով, այլ որոշում ընդունեց, բախումներից խուսափելու համար գնաց»:
Իսկ թե երեկվա իրադարձություններն ինչ ազդեցություն կունենան շարժման վրա, փորձագետը հետևյալ կարծիքն արտահայտեց. «Ամեն ինչ կերևա նրանից, թե ինչպես սա կգնահատվի, հետագայում ինչ որոշումներ կընդունվի, գնահատականներ, իհարկե, կան. ինքնին այդ բարդ վիճակից դուրս գալը դժվար է:
Հավելեմ նաև, որ իշխանություններն էլ բարդ իրավիճակում են, իրենք էլ տեսան, որ ստիպված են բերել հազարավոր ոստիկաններ, անգամ այնտեղ կային հատուկ զինված ջոկատներ, այսինքն իշխանությունները մի քանի հազար մարդու դեմ հանեցին ավելի շատ զորք: Սա, իհարկե, ցույց է տալիս, որ երկրում իրավիճակը շատ լարված է, և ժողովրդի մեջ վախ չկա: Ոչ ոք չէր ենթարկվում ոստիկաններին, երբ ասում էին «հեռացեք այստեղից», ժողովրդի մեջ կուտակված զայրույթը շատ բարձր է և այն զսպելն անկարելի է»:
Լուսանկարը՝ PanARMENIAN Photo-ի
