Թուրքական Dünya Bülteni լրատվական պորտալի փոխանցմամբ՝ Թուրքիայի ներքին գործերի նախարար Սելամի Ալթընօքը հայտարարել է, որ երկրի արևելյան ու հարավարևելյան տարածաշրջանում գործող «գյուղական պահապանների» (քուրդ վարձկաններ) թիվն ավելանալու է 5000-ով՝ կապված «Քրդստանի աշխատավորական» կուսակցության (PKK) գործունեության ուժգնացման հետ։
Այդ հայտարարությունից հետո գերատեսչությունը 22 նահանգում միանգամից 20.000 քաղաքացուց ստացել է դիմում՝ «գյուղական պահապան» դառնալու համար։ Ամենաշատ դիմումները ստացվել են Վանի, Մուշի, Բինգյոլի, Մարդինի, Բիթլիսի, Շըրնաքի նահանգներում։ Ամեն դեպքում առաջին փուլում պլանավորված է «գյուղական պահապանների» թիվն ավելացնել 5000-ով։ Ներկա դրությամբ նրանց թիվը կազմում է 46.500 մարդ։
Հիշեցնենք, որ գյուղական պահապանների (քուրդ վարձկաններ) համակարգը Թուրքիայում ստեղծվել է 1985 թվականի մարտի 26-ին ընդունված թիվ 442 Գյուղական կանոնի հիման վրա։ Թուրքիայում PKK-ի ակտիվ զինված պայքարը մեկնարկել է 1984 թվականին։
Գյուղական պահապանները վարչական առումով գտնվում են շրջանի ղեկավարի ենթակայության, իսկ մասնագիտական (պրոֆեսիոնալ) առումով՝ Ժանդարմերիայի հրամանատարության ներքո։ Գյուղական պահապանների գործունեությունը հիմնականում սահմանափակվել է իրենց գյուղերի սահմաններում, իսկ անհրաժեշտության դեպքում՝ նաև դրանցից դուրս։
Նրանց առաջադրանքներն են գյուղերի բնակչության անվտանգության ապահովումը զինված հարձակումներից (PKK), այդ հարձակումների մասին Ժանդարմերիայի մոտակա ստորաբաժանմանը ժամանակին իրազեկելը, գյուղերից մարդկանց առևանգմանը խոչընդոտելը և այլն։
Գյուղական պահապանների թիվը հասնում է մոտ 80.000-ի։ Որոշ տվյալներով` 1984-1999 թվականներին գյուղական պահապաններին վճարվել է 450 միլիոն դոլար աշխատավարձ։
