Ուկրաինայի նախագահ Պյոտր Պորոշենկոն ստորագրել է նոր տիպի պատժամիջոցների սահմանման մասին հրաման ընդդեմ Ռուսաստանի և այլ երկրների, որոնք «մասնակից են Ղրիմի բռնակցմանն ու Դոնբասում ագրեսիային»: Այս մասին գրում է BBC-ն:
Նոր «սև ցուցակում» ներառվել է գրեթե 400 ֆիզիկական և ավելի քան 100 իրավաբանական անձ:
«Այդ որոշումն ընդունվել է Եվրամիության, ԱՄՆ-ի և այլ երկրների մեր գործընկերների հետ հստակ համակարգմամբ, որոնք ապահովում են Ղրիմի բռնակցմանն ու Դոնբասում ագրեսիային անհրաժեշտ արձագանքը»,- ասել է Պորոշենկոն:
Պատժամիջոցները ենթադրում են ակտիվների արգելափակում, առևտրային գործողությունների սահմանափակում, Ուկրաինայի սահմաններից դուրս կապիտալի դուրսբերման կանխում, արտոնագրերի չեղարկում կամ դադարեցում:
Վերոնշյալ ցուցակում ֆիզիկական անձանց շարքում են Ռուսաստանի պաշտպանության նախարար Սերգեյ Շոյգուն, Գլխավոր շտաբի պետ գեներալ Վալերի Գերասիմովը և այլք:
Մի շարք ընկերությունների շարքում «սև ցուցակում» են հայտնվել նաև «Տրանսաերո» ավիաընկերությունն ու այն կլանած «Աերոֆլոտը»: Պատժամիջոցները ենթադրում են ռեսուրսների տեղափոխման մասնակի կամ ամբողջական, թռիչքների կամ Ուկրաինայի տարածքով փոխադրումների դադարեցում:
