Հայաստանում ընդդիմությունը փլատակների տակ է, չկա այնպիսի ուժ, որն ի վիճակի է լուրջ ընդդիմություն ձևավորել: Այսօր լրագրողների հետ հանդիպման ժամանակ այս մասին ասաց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը՝ խոսելով ներքաղաքական զարգացումների մասին:
Նա նշեց, որ ապրիլի 9-ին ՀՀ նախագահ Սերժ Սարգսյանը կգնա երդմնակալության: Եթե, ինչպես Նիկոլ Փաշինյանն էր ասում, հրապարակում կանգնի կես մլն մարդ, Րաֆֆի Հովհաննիսյանի երդմնակալությունը ևս իմաստ կունենա: Բանախոսի համոզմամբ՝ սակայն պահի դրությամբ ոչ մի տարբերակ այս չկա այնպես ազդելու ներքաղաքական իրավիճակի վրա, որ իրավիճակը շրջվի:
Ալեքսանդր Իսկանդարյանի կարծիքով՝ հասարակության շրջանում դժգոհությունները ու բացասական տրամադրությունները շատ ավելի լայն են, քան այն ուժը, որը կանգնած է հրապարակում՝ Րաֆֆի Հովհաննիսյանը, իր համակիրները, այն ուժերը, որոնք սատարում են իրեն:
Քաղաքագետի գնահատմամբ՝ այսօր չկա այդ ուժը, «Ժառանգություն» կուսակցությունը ևս չունի այդ ներուժը, որպեսզի այդ ավելի լայն դժգոհությունը դարձնի քաղաքական գործոն:
Ալեքսանդր Իսկանդարյանը նաև այն կարծիքին է, որ Սերժ Սարգսյանի ու Րաֆֆի Հովհաննիսյանի միջև երկխոսությունը ելք չէ, որովհետև հասարակության շրջանում դժգոհությունը շատ ավելի խորն արմատներ ունի: «Բայց Սերժ Սարգսյանը, ի տարբերություն Քոչարյանի, ցույց է տալիս իր ունակությունը՝ գնալու կոնսենսուսային ֆորմատների»,- նկատեց Իսկանդարյանը՝ հավելելով, որ լուրջ սպասումներ պետք չէ ունենալ, թե իշխանությունը ընդառաջ կգնա Րաֆֆի Հովհաննիսյանի առաջարկներին:
Նրա խոսքով՝ իշխանությունը միշտ գնում է զիջումների այն դեպքում, երբ ստիպված է, բայց ընդդիմությունն այսօր փլատակների տակ է: Քաղաքագետի համոզմամբ՝ լուրջ ուժ ձևավորելու համար տարիների աշխատանք է անհրաժեշտ: Մեկ անգամ բավարար չէ վերցնել հասարակության ձայների 40%-ը , մարզերում պետք է ունենալ վարկանիշ ունեցող գործիչներ, ֆինանսական միջոցներ, խմբակցություն՝ աճող, քաղաքական ներուժ, նախաձեռնող խմբակցություն՝ ամենօրյա աշխատանքով, որի գործունեությունից կձևավորվի քաղաքական լուրջ օրակարգ: Հացադուլով հնարավոր չէ դա անել:
Հնդկաստանում Գանդին սոված էր, բայց քառասուն տարի կառուցում էր երկիրը»,- նկատեց Իսկանդարյանը:
Լուսանկարը՝ PanARMENIAN Photo-ի
