Գորիսի քաղաքապետի ընտրություններում առաջադրված նախկին թեկնածու, Գորիսի «ԳԱՄՄԱ» ընկերության տնօրեն, գործարար Տիգրան Կարապետյանին երեկ կանչել են ոստիկանության Գորիսի բաժին՝ Սյունիքի մարզպետ Սուրիկ Խաչատրյանի մեքենայի ուղղությամբ հնչած կրակոցների
հետ կապված։
«Կատարվածից տեղյակ եմ մամուլից, այդքանը։ Երեկոյան գիշերը ինձ հրավիրել են ոստիկանություն, բացատրություններ եմ տվել։ Երևի այն պատճառով, որ կոնտեքստից կտրված հիմար բաներ են գրում մարդիկ։ Մենք այդ զրպարտիչների դեմ դատական հայցով հանդես կգանք։ Շատերին են կանչում բացատրություններ գրելու»,- «Առաջին լրատվական»-ի հետ զրույցում ասաց Տիգրան Կարապետյանը։
Հիշեցնենք, որ մայիսի 2-ին Սյունիքի մարզպետ Սուրիկ Խաչատրյանի որդու՝ Տիգրան Խաչատրյանի մասնակցությամբ ծեծկռտուքից հետո մեզ հետ զրույցում Տիգրան Կարապետյանը ասել էր, որ սա մեսիջ է` ուղղված Լիսկայից իրեն, քանի որ ծեծի հետևանքով տեսողությունը կորցրած Հարություն Զաքարյանն իր մտերիմ ընկերն է:
Նա նաև նշեց, որ ծեծկռտուքի հետևանքով տուժած ընկերոջը՝ Հարություն Զաքարյանին, տեղափոխել են ՌԴ, որտեղ այսօր ժամը 16։00-17։00-ին աչքը կվիրահատեն։
«Աչքն ամբողջությամբ վնասված է։ Ես բժիշկ չեմ, տերմիններով չեն կարող ասել, բայց Երևանում բժիշկն ասաց, որ ծանր վիճակ է։ Հիմա նա գտնվում է Ռուսաստանի Դաշնությունում, լավագույն բժիշկների հսկողության տակ է։ Գտել են լավագույն վիրահատող բժշկին, որը մեծ հեղինակություն ունեցող մարդ է։ Ասել է, որ երկու վիրահատություն պետք է անեն, եթե այսօր հաջող անցնի, որոշ ժամանակ անց երկրորդն են անելու, և եթե դա էլ հաջող անցնի, աչքը կմնա, բայց տեսողությունը վերականգնելու խոստում ընդհանրապես չի տվել։ Ասել է՝ առավելագույնը, եթե արևի լույսը տեսնի, դա կլինի բոլորիս հաջողությունը։
Սիլիկոնի նման ինչ-որ բան են ներարկելու, երևի թե պլաստիկ միջամտություն էլ է լինելու։ Ամբողջությամբ վիրահատությունը պլաստիկ չէ, բայց կան նման տարրեր»,-ասաց Տիգրան Կարապետյանը։
Հարցին, թե Ձեր ընկերը ոչինչ չի՞ պատմել տեղի ունեցածի մասին, նա պատասխանեց. «Ամեն ինչ էլ պատմել է, բայց նախաքննությանը չխանգարելու համար, նաև հաշվի առնելով, որ նա իմ հարազատ ընկերն է, և իմ ասածից հետո սուբյեկտիվ վերլուծություններ են անում, վերնագրեր են դնում, սենսացիաներ են անում, այդ ամենից հոգնել եմ, ես քաղաքական գործիչ չեմ, դրա համար հիմա չեմ կարող ոչինչ ասել, բայց ամբողջ եղելությունը պատմել է։ Հաստատ նախաքննությունը կհրապարակի, ամեն ինչ կտեսնենք»,- նշեց նա։
