Մարտի 13-ին CNN TÜRK հեռուստաալիքով ցուցադրվել է «1914-1915» 9 մասից բաղկացած փաստագրական ֆիլմի առաջին մասը։ Այս մասին գրում է թուրքական «Հյուրիյեթ» պարբերականը։
Ֆիլմը պատմում է Առաջին աշխարհամարտի, երիտթուրքական կառավարության, ինչպես նաև Հայկական հարցի մասին։
Ֆիլմի հեղինակ թուրք հայտնի լրագրող Թահա Աքյոլը, հավատարիմ մնալով Հայոց ցեղասպանության հարցում Թուրքիայի ժխտողական քաղաքականությանը, նշել է, որ պատերազմի տարիներին տեղահանություն է եղել, որի ժամանակ մարդիկ են մահացել։
«Պետք չէ մոռանալ արևելյան շրջաններում ռուսական զորքերին ցուցաբերած հայերի աջակցությունը։ Թեև իսկապես ցավալի է այն, ինչ կատարվեց տեղահանության ժամանակ, բայց տուժել են ինչպես հայերը, այնպես էլ մուսուլմանները։ Սա ընդհանուր ցավ է, բայց ոչ ցեղասպանություն»,- ասել է Աքյոլը։
Պաշտոնական Անկարան վերջին տարիներին փոխել է մարտավարությունը և փորձում է խիստ ժխտումից անցում կատարել ավելի ժամանակակից ու արդյունավետ միջոցների, այն է՝ Ցեղասպանությունը կոչել այլ բառերով: Թուրքական կողմն ակտիվորեն կիրառում է «ընդհանուր ցավի» թեզը, որն ամբողջովին արտացոլվեց նաև Էրդողանի անունից 2014 թվականի ապրիլի 24-ի նախօրյակին տարածված ուղերձում: Ըստ «ընդհանուր ցավի» թեզի՝ «Առաջին աշխարհամարտի տարիներին տեղի են ունեցել ցավալի դեպքեր, որին զոհ են գնացել ոչ միայն հայերը, այլ նաև թուրքերն ու այլ մուսուլմաններ, իսկ այդ ցավը բոլորինն է»։
Այսպիսով՝ Թուրքիան խուսափում է հայերի զանգվածային կոտորածներն ու հայրենազրկումը կոչել ցեղասպանություն, ինչպես նաև փորձում է հայերի «ցավը» տեղավորել Առաջին աշխարհամարտի շրջանակներում և հավասարեցնել թուրքերի կորուստներին, ինչը որևէ աղերս չունի իրականության հետ:
