Հարավային Կորեայի կառավարությունը հաստատել է բջջային հեռախոսների համար հավելվածներ, որոնք մշակվել են՝ ծնողներին զգուշացնելու համար, որ իրենց երեխան, հնարավոր է, պատրաստվում է ինքնասպան լինել: Այս մասին հայտնում է BBC-ի ռուսական ծառայությունը:
Հավելվածները վերլուծում են սոցցանցերում դեռահասների հաղորդագրությունների բովանդակությունը և ստուգում են բառերի առկայությունը, որոնք կարող են մատնանշել հեղինակի սուիցիդալ տրամադրությունները:
Եթե մեխանիզմը գործում է, դեռահասի ծնողների սմարթֆոնին ահազանգող ծանուցում է հասնում:
Հարավային Կորեայում շատ բարձր է դեռահասների ինքնասպանությունների թիվը, որը հաճախ կապում են դպրոցում, շատերի կարծիքով, չափազանց մեծ պահանջների հետևանքով առաջացող սթրեսի հետ:
Միայն անցած տարի իր կյանքին վերջ է տվել դպրոցական տարիքի 118 տղա և աղջիկ:
