Շվեդիայի դատախազությունը մտադիր է Լոնդոնում հարցաքննել Wikileaks-ի հիմնադիր Ջուլիան Ասանժին: TASS-ի հաղորդմամբ՝ այս մասին ասվում է ուրբաթ օրը մամուլի համար հրապարակված հաղորդագրության մեջ:
Ըստ տեղեկատվության՝ դատախազ Մարիան Նյուն ավստրալացու փաստաբաններին հարցում է ուղարկել՝ նրան հարցաքննելու և ԴՆԹ թեստ վերցնելու համաձայնության վերաբերյալ:
Անցած երեքշաբթի օրը Շվեդիայի Գերագույն դատարանը Ջուլիան Ասանժի գործի վերաբերյալ վճռել է, որ դատախազությունը պետք է պարզաբանում ներկայացնի հետաքննության հետագա վարման վերաբերյալ: Մասնավորապես, խոսքը համամասնության սկզբունքի մասին է, որի համաձայն՝ տարբեր կողմերի շահերը պետք է լինեն համաչափ, իսկ կիրառվող միջոցները չգերազանցեն կոնկրետ գործում անհրաժեշտի սահմանը:
Ասանժը Լոնդոնում Էկվադորի դեսպանությունում է 2012 թվականից, որպեսզի խուսափի Շվեդիա արտահանձնումից: Այնտեղ նրան մեղադրում են սեքսուալ բնույթի հանցագործությունների մեջ: Ասանժը հերքում է իրեն ուղղված բոլոր մեղադրանքները և դրանք համարում քաղաքական շարժառիթներով: Նա մտավախություն ունի, որ Ստոկհոլմն իրեն կարտաքսի ԱՄՆ, որտեղ նրան սպառնում է մինչև 35 տարվա ազատազրկում՝ լրտեսության և Պետդեպի գաղտնի փաստաթղթերի չարտոնված հրապարակման մեղադրանքով:
