Ռուսաստանը պատրաստակամ է բանակցել Մոսկվա-Սուխում-Թբիլիսի երկաթուղու վերագործարկման հարցով՝ հաշվի առնելով հանգամանքը, որ «Ռուսական երկաթուղիներ» ընկերությունը, միջպետական պայմանավորվածությունների համաձայն, մասնակցում է երկաթուղու աբխազական հատվածի վերագործարկմանը: Նման հայտարարություն է արել Ռուսաստանի արտգործնախարար Սերգեյ Լավրովը մարտի 11-ին Մոսկվայում Աբխազիայի արտաքին գործերի նախարար Վյաչեսլավ Չիրիկբայի հետ համատեղ ասուլիսի ժամանակ:
Միևնույն ժամանակ, Լավրովն ընդգծել է, որ հիմնական որոշումը պետք է կայացնեն այս գործընթացում անմիջականորեն ներգրավված կողմերը` Վրաստանն ու Աբխազիան:
«Առաջին լրատվական»-ի հետ զրույցում Վրաստանի ռազմավարական և միջազգային հետազոտությունների վրացական հիմնադրամի տնօրեն Ալեքսանդր Ռոնդելին ասաց, որ Լավրովի հայտարարությունը պարզապես ռուսական քարոզչության սովորական քայլ է: «Նա ասում է, թե հարցը պետք է որոշվի Աբխազիայում և Վրաստանում, բայց ինքն էլ գիտի, որ հարցը քաղաքական, այլ ոչ թե տնտեսական բնույթի է: Երկաթուղու վերագործարկումը քաղաքական հարց է, և քանի դեռ ինչ-ինչ քաղաքական հարցեր չեն լուծվել, երկաթուղին վերագործարկել հնարավոր չէ»,- ասաց մեր զրուցակիցը՝ հավելելով, որ «ոչ մի կերպ չի անցնելու Լավրովի այն պնդումը, թե հարցը վրացիներն ու աբխազներն են որոշելու»: Դրա համար, Ռոնդելիի դիտարկմամբ, Վրաստանը պետք է ճանաչի Աբխազիայի անկախությունը:
Միևնույն ժամանակ, մեր զրուցակիցն ընդգծեց, որ հասկանում է, որ Վրաստանի նմանօրինակ արձագանքը Հայաստանի համար լավ չէ, բայց ինչպես Հայաստանն ունի իր շահերը, այնպես էլ` Վրաստանը, և դրանց հակասող որևէ քայլի գնալ չի կարող: «Հասկանում ենք, որ Հայաստանը լավագույնս կօգտվեր դրանից, բայց մենք նման քայլի գնալ չենք կարող: Ես խոսում եմ նաև Վրաստանի հասարակության ու ղեկավարության մասին, որովհետև այսօր Վրաստանի ղեկավարությունն այդ դիրքորոշումն ունի: Համենայն դեպս, ես կարծում եմ, որ Վրաստանի քաղաքացիների մեծ մասը չի ցանկանա, որ երկաթուղին հիմա վերագործարկվի»:
Մեր այն հարցին, թե հնարավո՞ր է այս հարցով Ռուսաստանը ճնշումներ գործադրի Վրաստանի վրա, Ալեքսանդր Ռոնդելին արձագանքեց․«Իսկ ի՞նչ է Ռուսաստանն արել այս 20 տարիների ընթացքում, հենց ճնշում էլ գործադրում է: Դուք այլ բան տեսե՞լ եք: Ավելին՝ ոչ միայն ճնշում է գործադրում, այլև պատերազմում է մեզ հետ»:
Հետաքրքրվեցինք նաև, թե կարո՞ղ է Վրաստանը դիմակայել, եթե Ռուսաստանն, այնուամենայնիվ, պնդի այս հարցում: «Դժվար է, բայց Վրաստանը կկարողանա դիմակայել Մոսկվայի մոլագարների ճնշումներին»,- ասաց Ռոնդելին:
