«Ռուսթավի-2» հեռուստաընկերության «Արչևանի» հաղորդման եթերում «Ազատ դեմոկրատների» առաջնորդ Իրակլի Ալասանիան խոսել է վերջին մի քանի շաբաթներին Վրաստանի պաշտպանության նախարարությունից մեծ թվով աշխատակիցների հեռացման մասին:
«Վերջին մի քանի շաբաթներին պաշտպանության նախարարությունում հեռացումների մեծ ալիք է սկսվել: Ես ընդհանրապես խուսափում եմ մեկնաբանել պաշտոնում ինձ փոխարինածին և թիմին, բայց այն, ինչ վերջերս տեղի է ունենում, վնասում է պաշտոնական գերատեսչությանը»,- նշել է Ալասանիան:
Նրա խոսքով՝ գերատեսչությունից հեռացրել են մի քանի անձանց, ովքեր կրթություն են ստացել Արևմուտքում և ՆԱՏՕ-ի հաստատած բարեփոխման անբաժան մասն են:
«Դա, իհարկե, կասկածներ է ծնում: Դա, իհարկե, վիրավորական է բոլորի համար, քանի որ սկսած գործը պետք էր շարունակել: Նրանք կարող էին սկսել այն, ինչ նրանց տեսանկյունից պետք էր անել, բայց պետք էր շարունակել ձեռք բերված արդյունքը:
Նախարարը, առաջին անգամ ժամանելով Բրյուսել, նշեց, որ ինքն ընդունում է այն իրողությունը, որ շատ բան արդեն արված է, և կշարունակի դա, բայց խոսքը մի բան է, իսկ իրավիճակը՝ բոլորովին այլ: Հետո սկսվեց աշխատանքից մարդկանց հեռացումը որևէ մեկի հետ մտերմության և ծանոթության պատճառով: Դա ոչ մի լավ բանի չի բերի ոչ պաշտպանական գերատեսչությանը և ոչ որևէ հանրային ծառայության: Պետք է ընտելանալ, որ մարդիկ հանրային ծառայությում չպետք է փոխվեն, երբ փոխվում են քաղաքական պաշտոնյա անձինք: Դա պետք է իրականացնել: Մենք հասել ենք պաշտպանության նախարարության ապաքաղաքականացման, իսկ գերատեսչությունում տեղի ունեցողը կշրջի այդ գործընթացը»,- ասել է Ալասանիան:
Հարցին՝ արդյոք պաշտպանության նախարարությունից ինչ-որ մեկին հեռացրե՞լ են Իրակլի Ալասանիայի հետ ընկերության համար, «Ազատ դեմոկրատների» առաջնորդը պատասխանել է՝ ցավոք, այդպիսի նշաններ կան:
«Պետք է հաստատեմ, որ այդպիսի փաստերը մեկը կամ երկուսը չեն: Երբ մարդուն, որը երկար տարիներ աշխատում է այդ գերատեսչությունում, հեռացնում են այդ պատճառով, դա նշանակում է աշխատանքից ազատում քաղաքական դրդապատճառով: Ես դա հաստատում եմ, և այդպիսին է իմ տեսլականը»,- ասել է Ալասանիան:
