Թուրքական «Անադոլու» լրատվական գործակալությունը Արևմտյան Հայաստանի Մուշ քաղաքի Յեշիլովա գյուղում բնակվող դաղստանցիների մասին ռեպորտաժում անդրադարձել է նաև նախկինում այստեղ բնակվող հայերին։
Նշվում է, որ 122 տարի առաջ մեծաթիվ դաղստանցիներ Կովկասից տեղափոխվել են Մուշ, որտեղ նախկինում հայեր են բնակվել։
Թոշակառու իմամ Մեհմեթ Աթամանը նշել է. «Կովկասյան պատերազմից հետո մեր նախնիները հազարավոր կիլոմետրեր կտրեցին և հաստատվեցին Մուշում: Այս բնակավայրը շատ նման է Դաղստանին, այդ իսկ պատճառով նրանք նախընտրեցին բնակություն հաստատել հենց այս շրջանում։
Ռուսների՝ Անատոլիա (Արևմտյան Հայաստան-խմբ.) ներխուժելուց հետո մեր պապերի մի մասը Մուշից տեղափոխվեց Շանլըուրֆա (Ուրֆա) և Գազիանթեփ (Այնթափ)։ Այսօր Յեշիլովա գյուղում դաղստանցիների 50 տուն կա։ Պատմության ընթացքում այստեղ տարբեր մշակույթներ կրող ժողովուրդներ են եղել։ Սկզբում հայեր են բնակվել, այժմ գյուղում հիմնականում քրդեր ու դաղստանցիներ են ապրում»։
Մուշի հայերի զանգվածային կոտորածը սկսվել է 1915թ. հուլիսի 10-ից։ Քաղաքի և նրա շրջակայքի բնակչության մի զգալի մասը ոչնչացվել է, մի մասն էլ մեծագույն տառապանքներով տարագրվել այս ու այն երկիր. 15 հազար հայերից փրկվել են միայն 500-ը։
