«Քանի որ հանցագործությունը հրեշավոր էր, մարդիկ սպասում էին տեսնել մի ինչ-որ հրեշավոր կերպար, հանցագործ, սատանայական կերպար, բայց մեր էկրաններին ինչ երևաց, ինչ որ մի սովորական, պարզ, գեղջկական տեսքով ռուս տղա:
Այս պայմաններում չարդարացվեց հրեշ տեսնելու ներքին սպասումը, մանավանդ որ տղան առանձնապես ճնշված չէ, իր արածի ծանրության տակ կծկված տեսք չուներ: Բավականին բութ, հանգիստ տեսքով նստած էր և առանձնապես ոնց որ մասնակից չլիներ տեղի ունեցողին»,- վերլուծելով Գյումրիում Ավետիսյանների սպանության համար մեղադրվող Վալերի Պերմյակովի տեսագրության կադրերի` հասարակության վրա թողած պտավորությունը՝ «Փաստինֆո»-ի հետ զրույցում նշել է հեոգեբան Կարինե Նալչաջյանը:
Հոգեբանը հենց սրանով է բացատրում հասարակության մեջ ձևավորված այն տեսակետը, թե հասարակ գեղջուկ տղան չէր կարող նման հրեշավոր արարքի հեղինակը լինել: Այդուհանդերձ, սեփական մեղքի գիտակցության բացակայությունը, ըստ մասնագետի, չի կարող արդարացման հիմք լինել:
«Այն, որ այդ մարդու դեմքին բացարձակապես մեղքի զգացում, խղճի խայթ ու սեփական մեղքի ծանրության տակ կծկվածության արտահայտություն չկար, ամենևին չի խոսում այն մասին, որ նա չէ այդ սարսափելի ոճրագործության հեղինակը»,- ասաց Կարինե Նալչաջյանը:
Իհարկե, լիարժեք վերլուծություն կատարելու համար, Կարինե Նալչաջյանի խոսքով, մասնագետին ավելի շատ փաստեր են հարկավոր, մինչդեռ հոգեբանն այս պահին ունի հանցագործության մասին որոշակի տեղեկատվություն, ենթադրյալ հանցագործի լուսանկարը, որ հրապարակվեց հանցագործությունից անմիջապես հետո, և ՔԿ հրապարակած տեսանյութը:
Եվ, այդուհանդերձ, նույնիսկ այս սահմանափակ նյութերի վերլուծությունը Կարինե Նալչաջյանին թույլ են տալիս հետևյալ եզրակացությունն անել. «Ես տեսա բութ, հանգիստ հայացքով նստած, բարոյապես տհաս մարդ, որը բավական հանգիստ նստած էր, կարծես իր մտքերի հետ լիներ, մասնակից չլիներ այն ամենին, ինչ տեղի է ունենում»:
Բայց սա ամենևին չի նշանակում, թե հանգիստ նստած մարդը չէր կարող նման հրեշավոր հանցագործությունը կատարեր: Հակառակը, Կարինե Նալչաջյանի խոսքով, սա ավելորդ ապացույցն է այն բանի, որ մենք գործ ունենք «Բարոյապես տհաս» անձնավորության հետ:
Մանրամասները՝ սկզբնաղբյուր կայքում
