«Ջեբհաթ ան-Նուսրա» ծայրահեղական խմբավորման գրոհայինները հինգշաբթի օրը Դամասկոսի արևելյան Էրբին արվարձանում խախտել են հրադադարի մասին համաձայնագիրը՝ գնդակոծելով կառավարական ուժերի դիրքերը: Այս մասին հայտնում է «Ալ-Ահբար» թերթը:
Թերթի հաղորդմամբ՝ այդ արվարձան մարդասիրական օգնություն հասցնելու համար այնտեղ տանող անցումների ականազերծման աշխատանքները դադարեցվել են: Գրոհայինները կրակ են բացել բնակիչների ուղղությամբ, որոնք հավաքվել են հրապարակում և պահանջել, որ Էրբինից հեռանան ավազակախմբերը: Արդյունքում զոհվել է 6, վիրավորվել 35 մարդ:
Սիրիայի ռազմաօդային ուժերը հարվածել են հակառակորդի դիրքերի ուղղությամբ Հարաստայում, Զամալկում և Դումա քաղաքի մոտակայքում: Գրոհներ են իրականացվել զինված խմբավորումների դիրքերի վրա Դարայի և Համուրիայի արվարձաններում՝ Դամասկոսից արևմուտք: «Ալ-Ահբարի» տեղեկությամբ՝ երկրի մայրաքաղաքի մոտ մի քանի օրում ոչնչացվել է ավելի քան 40 գրոհային:
Հարավում զորքերը երեքշաբթի օրը վերադարձրել են Այն-էլ-Բուսթան բնակավայրի և Թել-Դալֆաա բլուրների վերահսկողությունը: Էլ-Կունեյթրայում սպանվել և վիրավորվել են «Ան-Նուսրայի» խմբավորումների տասնյակ վարձկաններ:
Քոբանիում քուրդ աշխարհազորայինները շրջափակել են ԴԱԻՇ-ի («Իրաքի և Շամի իսլամական պետություն») վերջին ամրությունները: Քուրդ հրամանատար Բուրհան Մուհամեդի խոսքով՝ քաղաքի 13 շրջաններից 10-ը ներկայումս աշխարհազորայինների վերահսկողության տակ են: Մի քանի օրում ոչնչացվել է 17 գրոհային, գրավվել 3 տանկ:
