Նախագահական ընտրություններից հետո քաղաքական դաշտը կգնա նոր ձևաչափի՝ ՀԱԿ-ի և ԲՀԿ-ի միջև: «Առաջին լրատվական»-ի հետ զրույցում նման համոզմունք հայտնեց Մոսկվայի «Միաբանություն» հայկական ազգային ակումբի ղեկավար Սմբատ Կարախանյանը՝ անդրադառնալով ներքաղաքական ներկայիս իրողություններին և հետընտրական հնարավոր զարգացումներին:
Սմբատ Կարախանյանի կարծիքով՝ գալիք նախագահական ընտրություններին ընդառաջ ՀՅԴ-ն, ՀԱԿ-ն ու ԲՀԿ-ն հստակ քաղաքական դիրքորոշում արտահայտեցին, որը կայանում էր հետևյալում՝ իմաստ չգտան մասնակցել անիմաստ միջոցառմանը, նախագահի թեկնածու առաջադրելը չընդունեցին՝ որպես ինքնանպատակ: Նրա խոսքով՝ քաղաքական բոյկոտ կարող էին հայտարարել.դա տարբերակներից մեկն էր: «Բայց էլի եմ ասում՝բոյկոտն ինքնանպատակ չպետք է լինի, պայքարը շարունակվում է, հարցը բոյկոտ հայտարարելը չէ, հատկապես ՀԱԿ-ի դեպքում, համոզված եմ՝ նաև ԲՀԿ-ի և ՀՅԴ-ի դեպքում պայքարը շարունակվում է, ունեն նույնական դիրքորոշումներ տարբեր հարցերի վերաբերյալ»,- նշեց Կարախանյանը:
Անդրադառնալով հետընտրական հնարավոր զարգացումներին՝ նա նշեց, որ քաղաքական ուժերի միավորում չի լինի:
«Սակայն ՀՀ քաղաքական դաշտը գնալու է նոր ձևաչափի վերաձևավորման, միանշանակ է այդ հարցը: Իմ կարծիքով՝ նոր քաղաքական ձևաչափ կլինի ՀԱԿ-ի և ԲՀԿ-ի միջև՝ քաղաքական և գաղափարական պայքարի նոր ձևաչափ: Այսինքն՝ այս քաղաքական միավորներն իրենց նոր ձևաչափը կառաջարկեն: Լևոն Տեր-Պետրոսյանի չառաջադրումը, դրանից հետո ստեղծված իրավիճակը, նախագահական ընտրությունների վերաբերյալ ԲՀԿ-ի դիրքորոշումը ստիպում են նոր տարբերակի, այլ տարբերակ չկա, պետք է լինեն նոր ձևաչափեր: Նոր ձևաչափերն, իմ կարծիքով, ավելի շատ միտված են դրական փոփոխությունների, քան բացասական: Եթե Հայաստանում չի փոխվում իշխանական բուրգը, չի փոխվում այն արժեհամակարգը, որն ունեն մարդիկ՝ սպասեն ընտրություններին, որ գումար վերցնեն, եթե փոխվի արժեհամակարգը, կփոխվի իշխանական համակարգը: Եթե սա չլինի, ՀՀ-ն կդառնա արտաքին հզոր ուժերի մրցակցության թիրախ, կոնֆլիկտային գոտի, որից կտուժենՀՀ պետականությունը և ՀՀ քաղաքացիները: Արտագաղթը կխորանա և կառաջանա մի խայտառակ իրավիճակ»,- մեկնաբանեց Սմբատ Կարախանյանը:
Նրա համոզմամբ՝ բոլոր քաղաքական ուժերը հիմնականում մի առանցքի շուրջ են աշխատանք տանում՝ հայամետ քաղաքականություն, իսկ ՌԴ-ին այսօր պետք են հենց նման ուժեր, որպեսզի հայկական ազգային պետականությունն ուժեղ լինի, որովհետև տարածաշրջանային կոնֆլիկտները դա են պահանջում, իսկ նորմալ պետականությունը հնարավոր է ժողովրդավարական ընտրությունների միջոցով ձևավորված իշխանության միջոցով: «Նոր ձևաչափը, չեմ կարծում, թե ռուսական պլատֆորմ դառնա: Ռուսական իշխանությունների ցանկությունն այն է, որ հայաստանյան քաղաքական դաշտում ձևավորվի պլատֆորմ, որը հանդես գա հայկական պետականության և ժողովրդի շահերից: ՌԴ-ն Հայաստանում քաղաքական պլատֆորմ ստեղծելու խնդիր չունի, ՀՀ-ի հետ տարբեր ոլորտներում համագործակցությունը շարունակելու խնդիր ունի, որի համար անհրաժեշտ են հայաստանամետ ուժեր»,- եզրափակեց իր խոսքը Մոսկվայի «Միաբանություն» հայկական ազգային ակումբի ղեկավար Սմբատ Կարախանյանը:
