Դեկտեմբերի 26-ին Սումատրա կղզուց արևմուտք՝ Հնդկական օվկիանոսում տեղի է ունեցել վերջին 50 տարվա ամենաուժեղ երկրաշարժը՝ հայտնում է russian.rt.com-ը: 9 բալ մագնիտուդով ցնցումները շարժել են երկրակեղևի հսկայական հատվածներ, ինչի հետևանքով ձևավորվել է 1200 մ երկարությամբ բեկվածք: Տեկտոնական սալիկների տեղաշարժն առաջացրել է հսկա քանակությամբ ջրի տեղաշարժ, որի էներգիան հավասար էր Հիրոսիմայի վրա նետված 23 000 միջուկային լիցքի: 1000 կմ/ժ արագությամբ ալիքը սկսել է արագորեն առաջ գնալ Հնդկական օվկիանոսի բոլոր ուղղություններով:
Մի քանի ժամում ցունամին հասել է 13 երկրների ափեր՝ Արևմտյան Աֆրիկայից մինչև Թաիլանդ: Շատ տեղերում ալիքներն անցել են մինչև 2 կմ ցամաքի խորք, որոշներում՝ 4 կմ: Չնայած երկրաշարժի և ցունամիի միջև անցել է միջինը 50 րոպեից մինչև մի քանի ժամ՝ զբոսաշրջիկների և տեղի բնակիչների մեծ մասի համար մահաբեր ալիքն անակնկալ է եղել, քանի որ տուժած երկրներից գործնականում ոչ մեկում այդ ժամանակ ցունամիի նախազգուշացման համակարգ չի եղել:
Ինդոնեզական Բանդա-Աչեխ քաղաքը, որը երկրաշարժի էպիկենտրոնին ամենամոտն է եղել, իր վրա է ընդունել ամենաուժեղ հարվածը: Բնակավայրը բառացիորեն վերացել է Երկրի երեսից 10 մ բարձրությամբ ալիքի հետևանքով: Այդ օրն Ինդոնեզիան ավելի քան 160 հազար մարդու է կորցրել:
Այնուհետև ավերիչ հարվածն իր վրա է ընդունել Թաիլանդը: Մարդիկ զգուշացված չեն եղել գալիք աղետի մասին, ուստի լողափերին հանգստացել են՝ կարծես ոչինչ չի եղել: Շատերը կարծել են, թե ավերիչ ալիքն ատրակցիոն է, մնացել են լողափին ու շարունակել նկարահանել մոտեցող ցունամին:
Աղետն ընդգրկել է նաև Մալդիվները: Երկրում արտակարգ դրություն է հայտարարվել, մայրաքաղաքի օդանավակայանը մի քանի օր չվերթեր չի ընդունել:
Շրի Լանկայի հարավարևմտյան ափամերձ տարածքում 9 մ բարձրությամբ ալիքը հարվածել է ուղևորներով լի Samudra Devi ուղևորատար գնացքին, ինչի հետևանքով մոտ 1700 մարդ է զոհվել: Այդ աղետը խոշորագույն երկաթուղային վթարն է համաշխարհային պատմության մեջ:
Երկրաշարժի և ցունամիի հետևանքով զոհվածների ընդհանուր թիվը գնահատվում է մոտ 235 հազար մարդ, տասնյակ հազարավոր մարդիկ անհետ կորել են, 1 մլն-ից ավելին մնացել առանց տանիքի: Աղետի գոտում աշխատած բարեգործական կազմակերպությունների տեղեկությամբ՝ յուրաքանչյուր երրորդ զոհը եղել է երեխա: Ցունամին խլել է նաև ավելի քան 9.000 օտարերկրացի զբոսաշրջիկների կյանք:
http://youtu.be/1J8Feyr38Sshttp://youtu.be/1J8Feyr38Ss
http://youtu.be/7jrpcIiSbDc
