Դևիդ Բոուին կմասնակցի «Արդյոք նրանք գիտե՞ն, որ Սուրբ Ծնունդ է եկել» սինգլի ձայնագրությանը, որի վաճառքից ստացված գումարները կփոխանցվեն էբոլա վիրուսի դեմ պայքարի հիմնադրամին: TASS-ի հաղորդմամբ՝ այս մասին Լոնդոնում մամուլի ասուլիսի ժամանակ հայտնել են այդ երգի հեղինակներ The Boomtown Rats խմբի նախկին անդամ Բոբ Գելդոֆը և Ultravox խմբի վոկալիստ Միջ Յուրը:
Բոուից բացի՝ սինգլի ձայնագրությանը կմասնակցեն One Direction խումբը, բրիտանացի երգիչ Սեմ Սմիթը, Coldplay խմբի վոկալիստ Քրիս Մարտինը: Սկավառակի շապիկի դիզայնը հեղինակել է բրիտանացի հայտնի նկարչուհի Թրեյսի Էմինը:
Ստեղծագործությունը կձայնագրեն նոյեմբերի 15-ին, նոյեմբերի 17-ին կտեղադրեն համացանցում: Գելդոֆն ունկնդիրներին կոչ է արել ոչ միայն սինգլն անվճար բեռնել համացանցից, այլև գնել կոմպակտ-սկավառակը էբոլայի դեմ պայքարում ֆինանսական ներդրում ունենալու համար:
