Հինգշաբթի օրը Դուբայում կբացվի զեղչերի սեզոնն ու դրան ուղեկցող միջազգային փառատոնը: Կազմակերպիչների հաղորդմամբ` 32 օր մեծ զեղչեր են խոստանում Դուբայի մոտ 70 խոշորագույն առևտրի կենտրոններ,- հայտնում է RIA Novosti-ն:
Նախատեսված է մոտ 150 համերգ, թատերական ու կրկեսային ներկայացում, այլ միջոցառումներ: Այցելուները կկարողանան ծանոթանալ գորգերի, այդ թվում` պարսկական, պատրաստման արվեստին, ներկա լինել չինական, եգիպտական ոճով թեյախմությունների արարողություններին, նույնիսկ մի քիչ ապրել բեդվինների վրանում:
Գնումներն ու մշակութային միջոցառումները միավորելու միտքը ծագել է Դուբայում 1996 թ., երբ անցկացվել է «Մեկ աշխարհ, մեկ ընտանիք» նշանաբանով առաջին առևտրային փառատոնը:
Փառատոնի շրջանակներում կիլոգրամներով ոսկի, շքեղ ավտոմեքենաներ և այլ արժեքավոր մրցանակներ են խաղարկվում: 2012-ին առևտրային փառատոնի ընթացքում զբոսաշրջիկներն ու տեղի բնակիչները ծախսել են մոտ 4 մլրդ դոլար:
