Որքան էլ ՀՀԿ խոսնակ Էդուրադ Շարմազանովն ասի, թե երեկ կայացած ՀՀԿ ԳՄ նիստի ժամանակ Սյունիքի նոր մարզպետի նշանակման հարցը չի քննարկվել, սակայն որոշ տեղեկություններով՝ Սերժ Սարգսյանը նիստին ներկա Սուրիկ Խաչատրյանին մարզպետ նշանակելուց առաջ հանձնարարել է ստորագրահավաք անցկացնել Սյունիքի մարզում: Եթե հավաքի անհրաժեշտ քանակությամբ ստորագրություն և ցույց տա, որ ինքը դեռ ընդունված է մարզում, կստանա բաղձալի նշանակման հրամանը:
Որոշ տեղեկություններով՝ Սուրիկ Խաչատրյանն արդեն իսկ լծվել է այդ գործին և իր մտերիմներին ու շրջապատին ևս լծել է հավաքելու անհրաժեշտ ստորագրությունները:
Մասնավորապես՝ Սիսիան քաղաքում այդ գործը վստահված է մաքսային ծառայության պետ Աշոտ Մինասյանին, Գորիսում այդ գործով խառնվել են իր բարեկամներն ու հարազատները, ինչպես նաև մարզպետարանի գյուղատնտեսության և բնապահպանության վարչության պետ Սամվել Թանգյանը: Կապան քաղաքում ստորագրություններ են հավաքում քաղաքապետարանի աշխատակազմի ղեկավարը և Վիկա անունով մեկ այլ աշխատակից: Իսկ Մեղրի և Ագարակ քաղաքներում այդ «լուրջ» գործը վստահված է քաղաքապետներին:
Սակայն սյունեցիների խոսքով՝ Լիսկայի մարդիկ ստորագրահավաքն անցկացնում են իրենց շրջապատում: «Նրանք վախենում են հրապարակային դուրս գան և ժողովրդից ստորագրություն հավաքեն, քանի որ շատ լավ գիտեն, թե սյունեցիները ոնց են զզվում այդ մարդուց: Ստորագրությունները հավաքվում են իրենց պատկանող գործարաններում, ձեռնարկություններում, հանքերում, մարզպետարանի այն աշխատակիցների շրջանում, որոնք դեռ համարվուն են Լիսկայի մարդիկ: Մի խոսքով՝ իրենք իրենց մեջ ստորագրություն են հավաքում, որ համոզեն, թե գորիսեցիներն ուզում են, որ Լիսկան վերադառնա»,- «Առաջին լրատվական»-ի հետ զրույցում դժգոհեցին սյունեցիները՝ հավելելով, որ հնարավոր է՝ նաև բնակչության շրջանում էլ մեկ-երկու հոգի ստորագրի, բայց մենակ վախից ելնելով: «Դե կմտածեն վաղը-մյուս օրը մարզպետ կնշանակվի, ինչ-որ հարցեր կունենան, ինչ-որ ձևով պետք կգա: Բայց մնացած դեպքերում ոչ մի իրեն հարգող սյունեցի չի ստորագրի Լիսկայի վերադարձի համար»,- հավելեցին մեր զրուցակիցները:
