Դատական ակտերի հարկադիր կատարման ծառայությունն այսօր կեսօրին առանց որևէ փաստաթուղթ ցույց տալու 30-40 աշխատակցով ներխուժել էր Մարզահամերգային համալիրի շենք և գույքագրում էր իրականացնում՝ դուրս հանելով աշխատակիցներին ու կնքելով շենքի բոլոր դռները:
Հիշեցնենք, որ օրերս ավարտվեց համալիրի հերթական աճուրդը, որի ժամանակ ևս շենքի գնորդ չհայտնվեց:
ԴԱՀԿ աշխատակիցները թույլ չտվեցին լրատվամիջոցներին ներս մտնել շենք և տեսնել, թե ինչ է կատարվում: ԴԱՀԿ աշխատակիցներն անգամ փակել էին դեպի համալիր տանող ճանապարհը և թույլ չէին տալիս, որ մեքենաները մոտենան շենքին՝ փաստացի իրականացնելով ճանապարհային ոստիկանության ֆունկցիաներ: Բացի այդ՝ համալիրի շենքը հսկում էին նաև ռազմական ոստիկանության աշխատակիցներ: Այդ փաստը հաստատեց նաև համալիրի մամուլի խոսնակ Կորյուն Գրիգորյանը: Նրա խոսքով՝ ռազմական ոստիկանության երկու դիտակետ է տեղադրվել համալիրի տարածքում դեռևս հուլիսի 26-ից սկսած: «Սա մեզ համար շատ անհասկանալի էր, թե ինչ մի ռազմավարական նշանակության վիճակ էր ստեղծվել, որ ՌՈ-ի ներկայացուցիչները հսկողություն են իրականացնում: Մենք նրանց բացատրեցինք, նրանք հեռացան, բայց այդ վիճակը կրկնվեց: Երկու դիտակետը շարունակում է մնալ, ճանապարհները փակ են, աշխատանքները խոչընդոտվում են»,- ասաց Գրիգորյանը: Ինչ վերաբերում է ԴԱՀԿ-ի գործողություններին, Գրիգորյանի խոսքով՝ դրանք անօրինական են, քանի որ աճուրդից առնվազն 14 օր հետո նրանք կարող էին ինչ-որ քայլեր ձեռնարկել, իսկ այս ժամանակահատվածում իրենք կարող են գումարը վճարել, և շենքը մնա իրենց: «Եթե աճուրդային փուլը շարունակվում է, ամեն ինչ ավարտված չէ, ապա մենք իրավունք ունենք գումարը վճարելու դեպքում շարունակել մեր աշխատանքը: Մենք նվազագույնը 14 օր ժամանակ ունենք: Բայց իրենք փաստացի ժամանակից շուտ աշխատողին զրկում են աշխատելու իրավունքից»,- ասաց Գրիգորյանը: Նա կատարվողը կարճ գնահատեց որպես պետական ռեկետ. «Սա պետական ռեկետ է, խայտառակություն: Սա սեփականատիրոջ իրավունքների կոպտագույն խախտում է»:
Համալիրի մամուլի խոսնակի խոսքով՝ անճշտություն է տեղի ունեցել նաև կառույցի գնահատման ժամանակ: Այն շատ էժան է գնահատվել, քանի որ կառույցը գնահատող կազմակերպության ղեկավարը ԴԱՀԿ ծառայության պետի ընկերն է: «Ընտանեկան բիզնեսի են վերածել: Մեկը գնահատում է, մյուսը իրացնում է այդ ամեն ինչը: Հենց դրա շնորհիվ է, որ այսօր կառույցը գանգատվել է կես գնով կամ ավելի քիչ, քանի որ իրականում արժի 100-120 միլիոն և ոչ թե 42: Իրենք անում են ամեն ինչ, որպեսզի սեփականատիրոջը ժամանակ չմնա, որ նա վճարի գումարը և կանգնեցնի այս գործընթացը: Դրա համար էլ ասում եմ, որ սա պետական ռեկետ է, խլելու փորձ»:
Կորյուն Գրիգորյանը տեղեկացրեց, որ իրենք պատրաստվում են ԴԱՀԿ-ի այս ապօրինի գործողությունները բողոքարկել ընդհուպ Եվրոդատարանում, քանի որ, նրա խոսքով, Հայաստանի այսօրվա դատական համակարգն ի զորու չէ ինքնուրույն որոշում կայացնելու:
