1952թ. Ֆուլխենսիո Բատիստան Կուբայում հաստատեց բռնապետական ռեժիմ: Կարճ ժամանակ անց հանրապետությունում նրա դեմ սկսվեցին ապստամբական շարժումներ, որոնք գլխավորեց Հավանայի համալսարանի շրջանավարտ, երիտասարդ փաստաբան Ֆիդել Կաստրո Ռուսը, որը ծագումով Օրիենտեից էր:
1953թ. հուլիսի 26-ին մի խումբ զինված մարդիկ՝ Կաստրոյի գլխավորությամբ, փորձեցին գրավել բանակային զորանոցները Մոնկադա ամրոցում՝ Սանտյագո-դե-Կուբա քաղաքում: Սակայն հեղափոխականները անհաջողության մատնվեցին:
Ապստամբների մեծ մասը կալանավորվեց: Դատարանը Կաստրոյին դատապարտեց 15 տարվա ազատազրկման, սակայն 1955թ. մայիսին հասարակական ճնշման ներքո նա համաներմամբ ազատ արձակվեց ու արտաքսվեց Կուբայից:
Կաստրոն՝ իր համախոհների հետ տեղափոխվեց Մեքսիկա: Բռնապետին տապալելու հույսը, սակայն, նրան չլքեց, և նա ԱՄՆ-ում ու Մեքսիկայում կազմակերպեց «Հուլիսի 26-ի շարժումը»՝ ակտիվորեն նախապատրաստվելով զինված հեղաշրջման:
