«Հրապարակ»-ը խմբագրականում գրում է. «Այ, հենց այսօրվա համար էր մայիսին այդքան ջանք թափում Հանրապետականը, որ Ազգային ժողովի «որակյալ մեծամասնությունն» իրենը լինի: Այս պարագայում, անշուշտ, ամոթ է «որակյալ» բառն օգտագործելը, քանի որ ՀՀԿ խմբակցությունն այս բառի նախնական իմաստի հետ բոլորովին կապ չունի` ճիշտ հակառակը: Բայց իր կիսատ-պռատությամբ այնուամենայնիվ կարողացել է այնպիսի քանակի մանդատներ ձեռք գցել, որ պարզ գլխաքանակով կանխորոշի նիստերի ճակատագիրը և ցանկացած ֆորս-մաժորից զերծ մնա:
Ի՞նչ իմաստ ուներ քվորումի բացակայությամբ տապալել խորհրդարանական ընդդիմության` արտահերթ նիստ հրավիրելու նախաձեռնությունը, այս օրերին հարցնում են մարդիկ: Չէ՞ որ միևնույն է` քվեարկության պահին կարող էին պարզապես դեմ քվեարկել: Բանն այն է, որ երեկվա նիստով նախադեպ ձևավորեցին և ընդդիմությանն իր «տեղը» ցույց տվեցին: Այսպես ասած, ուժի ցուցադրություն, որ մեր դեմ խաղ չկա` անգամ մի էլ փորձեք: Բա իզո՞ւր էինք ժամանակին փող ծախսում, գիշեր-ցերեկ աշխատանք տանում, ադմինիստրատիվ լծակները գործի դնում` ամեն քվեի համար կռիվ տալիս, ամեն մանդատն ատամներով պոկում, բազարների մեջ մտնում, կարուսելներ անում ու անձնագրեր տպում: Է, է` ընդդիմություն ջան, «չաշխատեցիր ամռանը», հիմա էլ «բռնիր վեր-վերի»` փողոցներում միտինգներ արա, հայտարարություններ տարածիր ու քո մի քանի մանդատով բավարարվիր` ասում է Հանրապետականն ու հռհռում քաղաքական կատեգորիաներից խոսող, ընտրական արդարություն պահանջող ընդդիմության վրա: Իրավունք ունեն` մինչ մենք ճառ ենք ասում, նրանք զանգ են կախում: Այ, շուտով ևս 2 մանդատ իրենցով կանեն, նախագահի պաշտոնում էլ իրենց թեկնածուն կվերընտրվի, և առաջիկա հինգ տարին կգա վայելքի, թալանի, ժողովրդին կեղեքելու, երկիրն իսպառ դատարկելու ժամանակը»:
